العامريه والدواسر

[قرناس]

السلام عليكم ورحمة الله وبركاته


كيف حال الربع وعساكم بخير طيبين......................


.الموضوع الي ابتكلم عنه هو متعلق بشاعره من سبيع يقال لها وسيم العامريه


وهالشاعره ذبحو عيالهاالسبعه

واخوانها التسعه بمعركه وحده :( :(

وهالمعركه الله يسلمكم كانت مع اولاد زايد(الله يكفينا شرهم لا زعلو) :mad: :mad:

والدليل قوله:






على سبعة عيال مع تسعة اخوة=
في دقل سمحين الوجيه آل زايد
و وسيم هي التي يقصدها الامير محمد الاحمد السديري في قوله:
تشهد على ما قلته العامريه=
جضت سبع من عويل بكاه


وهذه المعركه كانت في زمن الشيخ ناصر المبيعيج والشيخ عامر ابن بدران

وهي معركة ثار لمعركه سابقه انتصر فيها السبعان ولكن اولاد زايد
ردو الصاع صاعين في هذه المعركه

(خيرها بغيرها يالسبعان);) ;)


والان نورد القصيدة كامله

تقول العامريه:



قالت وسيم العامريه واشرفت=
عند العشي والدمع منها بدايد
والله لولا ذلة تشمت العدا=
وتستر بالفرقا كبود غدايد
لا اعوي عوا السرحان في جرهديه=
واعوى عواه بنايفات الفرابد
على سبعة عيال مع تسعة اخوة=
في دقل سمحين الوجيه آل زايد
بشر غدا عند المبعيج ناصر=
غدا بينهم يوم اختلاف الوعايد
يا طول مابيتي مرب لهجمه=
واليوم تذري به ذواري النفايد


وبعد ما سمعو الدواسر به الابيات قامو يبون يكرمون وسيم

قالو لوسيم تبين نرد النياق والا تبين من نخل الدواسر

وبعد تفكير :confused: :confused:


قررت انها تبي نخل وفعلا عطوها نخل وتستاهل العامريه


واقول في النهايه عساكم استانستو بهل المشاركه البسيطه


:D :D :D

واخيرا اقول ونعم والف نعم بالدواسر والسبعان وكلهم اخوه تحت دين واحد


والسلام عليكم ورحمة الله وبركاته:

[الباسل]

ونعم بالجميع

السبعان والدواسر كلهم اخوان


.
.
.
.
.
.
.
.
واليك أبيات من حربيه للشاعرلعايض ابن منصورابن عيسى الدوسري :



لاد زايد مثل سيلٍ طما فوق الديار=جدنا المنعور زايد وحن وراثته

حن شبوب الحرب لامن تقابس له شرار=كم عقيدٍ لاذكرهم تردا حالته

كم صبيٍ طاح في دقلهم يوم المغار=لابتي تلحق حديد السلاح انهايته

ضيفهم لامن لفا حط له عز وكار=وبالكرم يثني عليهم الاجا لابته

المجالس ماتصك ولايطفي الوجار=دايمٍ والنجر يلحق بحسه غايته




تحياتي أخي قرناس

[يرموك]

كلكم حلوين والله يديم المحبة تشكرون على المجهودات الجميله

[قرناس]

اشكرك اخي الباسل على هذه الابيات ولجهودك للرقي بالمنتدى

واشكرك اخي النشط جدا يرموك على التواصل

[الباسل]

العفو أخي الحبيب قرناس

ومالنا طيب

أهم شي انا نحاول نرضيك انت وشرواك

تقبل تحاتي وشكري وتقديري

[shamekh6]

أخوي العزيز قرناس
دائماً موضيعك جزله
وقد أضفيت جمال بسرد القصه
بهذا الاسلوب الرائع المحبب لنفس

أخوك الشايب كتب القصيده كما وجدها في مؤلف قديم
والإختلاف بسيط علماً أن البيت الثالث ليس موجود في المؤلف
وقد وضعته في موضعه لإني قد سمعتها كثيراً والبيت هذا موجود

أخي استسمحك في ما فعلت.





قالة أوسيم العامريه و شرفة"="عند الضحى والدمع غادي بدايد
على تسعة أولاد مع سبعة أخوه"="في ورد سمحين الوجيه آل زيد
بـشـر غــدا عـنــد المبـعـيـج نـاصــر"="غـدا بينهـم يــوم اخـتـلاف الوعـايـد
قولو البيت الفقر لايامن الغنى"="وبيت الغنى لايامن الفقر عايد
يا طول ما بيتي مربٍ اللهجمه"="واليوم تومي به هبوب الشدايد
هل سبق مع حرب خيل وهجمه"="وهلها مضرينها بلفح الجرايد
والله لولا ذلتي تشمت العداء"="وتستر بالفرقا أكبود غدايد
لعوي أعوا السرحان في جرهديه"="وعوي عواه أبنايفات الفرايد

[أبن راشد]

يعطيكم الله الف عافية جميعاً

[عندليب قطر]

من بدى في تحمل ماجاه والعامريه تحملت اللي جاهم . . .




بيض الله وجوه الدواسر ووجهك ياقرناس لانك نشرت هذه القصيده والقصه .

[الدوسري القصيمي]

شكراً لكم

نريد المزيد من أبناء زايد الكرام

[نهار]

شكرآ لكم جميعآ علي النقل والاضافة
بارك الله فيكم علي الجهود المبذولة
ونحن بحاجة المزيد فلا تحرمونا الاستمتاع بكل ما لديكم
تحياتي

[الغريب]

القول على الفعل يجيك مثل الذهب الصافي ,,,,,,,,,,,

[ابن عياض]

اخوي قرناس ماقصرت بس السالفه ليسة كامله والي نعرفه ان المصارير هم الذين اغارو على سبيع وكان ابن بدران قد طلب منهم ذالك وبعج الخطه ناصر المبيعيج وسميا بذالك

[غزاااال]

السلام عليكم


بصراحة اعجبتني القصة واللي عنده المصدر عدل

يكتبها كاملة على شان نستفهم الموضوع عدل

وكلنا عيال ادم وحوا واخوان في الاسلام


تسلم الايادي

[السبيعي]

تم حذف الرد لخروجه عن سياق الموضوع

[ولد المبيعيج]

يالسبيعي اسمع عسى الله يهديك ويطهر لك السانك

هذا تعليقيك وردك وانا ادري انها ردة فعل منك لكن اعرف الواقع وشف دلاليله!!


المشاركة كانت مجرد ذكر لواقع القصة ولافيها اي اساءة واهانة

ورح شف منتداكم يالغلبا؟؟؟اللي كله ذم للقبايل ماخليتو قبيلة اللا ذميتوها عتيبة,ومطير ,والعجمان وكم مرة جبتوا طاري الدواسر على غير السنع
وسبيتوا مشايخهم.باقي شوي وتدعون انكم ملائكة مخلوقين من نور وان الناس الباقين ادنى منكم

ولاهيب غريبة يوم نطقها احد مشرفينكم بمعنى كلامه انه يقول ان الارض شرف لها لامشى عليها

السبيعي؟؟والنعم في السبعان ماقلنا شي!

ويوم ردينا بالمنطق والعقل قاموا مشرفينكم يحذفون المواضيع والردود وعرفوا مقدار غلطتهم

حتى ان بعضهم تواجه مع احد الاخوان من منتدى السليل على البريد الالكتروني واعترف بغلطة
ربعه .

المهم

انت الحين مع ردك هذا تحس انك فضفضت غيظك ؟؟
ترى الكلام سهل والكتابة اسهل منه لكن الصعب عليك انك تعترف بالحقيقة المرة
وتقطع الرجال من حقوقها

ولو انك اجبرتني على اني اذكرك ببعض امجاد الدواسر فيكم

لاتنسى يوم العريق اللي عهده قريب وانشد شيبانك

لاتنسى دياركم اللي راحت منكم على يد البدارين الدواسر البير وثادق

ولا ابي اطول معك ,,وكنت ماتمنى اني اتطرق لمثل ذي السوالف اللي كلها نعرات وعصبية
واللي بقوله ان كل قبيلة فيها قسمها

واتمنى منك انك توزن كلامك بأدب وحشمة ,والمشرف حذف عباراتك وسبك وودي اني خلاها
لانه جعل ردك مناقشة بعد تعديله لكن عنوان ردك يشهد عليك... ولا انت اللي بتجي اعلى منا في موازين الطيب,,,
سبيع مانقول فيهم شي هم ربع واخوان وعواني واللي فات تبدل بمودة وقرابة
والمهازل ماتجي اللا في اوقات الرخا !!الله لايغير علينا ويديم نعمته


ونسأل الله انه يديم علينا نعمة الاسلام والدين

[السبيعي]

يالمغترب انا يوم زعلت ماهو من القصة ولكن من طريقة الراوي اللي انا هاجمته يوم يقول راحت

عليكم والكلام اللي بين الاقواس اللي على غير سنع وياليته عاد جاب القصه من بدايتها والا العامرية

مالها ذنب يغزونها الدواسر لانها من سبيع ال عامر وهم ماغزوا الدواسر اللي غزاهم هم سبيع

الزكور اللي غزوا الوداعين والمساعره وخذوا ابلهم.

وكل ماسأل عقيد الدواسر المبيعيج البزارين وهم يلعبون وين ابوانكم ردوا ذبحوهم سبيع...

ففكر الدواسر بالانتقام وكان اقرب السبعان لهم العامريه وعيالها فغزوهم وفي يوم عيد بعد

في يوم عيد ياقرناس..

وبعدين ثادق يالمغترب عمرها ماكانت لسبيع لانهم خذوها بالقوه من البدارين اللي استردوها بالقوة

ايضا وانا ما هاجمت شيوخكم ومنتدى الغلبا كذلك واذا كان هناك هجوم او تعدي فدلني عليه ..

وهذا ونعم بالغلبا ونعم بعيال زايد وتقبلوا تحياااااااااتي

حنا اهل الغلبا اللي عالين مجدها .................... في وقتن مضى وفي وقتنا الحالي

كم ديرتن حظها الشين لاشك حدها..................... وذاقت من كف سبيع سمن زلالي

وكم قومن على ركايبن يتعبك عدها .....................ردها قرمن ماترهبه سود الليالي

يوومي بشلفا لساحات الوغى كدها .........................كما بارقن تقطف رووس الرجالي

[ولد المبيعيج]

يالسبيعي بالنسبة للهجوم والتعدي هو موجود وامره مشهود بين اعضاء شاركوني في الرد

والمشرفين عندكم في منتدى الغلبا اكيد لهم المقدرة انهم يردون الروابط المحذوفة وتقراها


وبعدين لي تعليق على كلامك يوم انك تقول(الركوز اللي غزوا الوداعين والمساعره وخذوا ابلهم )

يعني بالعقل والمنطق الدواسر في ذاك الوقت مبعد تفرعت فخوذهم ولاكان فيه شي اسمه وداعين ومساعرة

والمبيعيج ناصر هو جد الوداعين في ذاك الوقت وتو احفاده مبعد جاو (الوداعين)

وعامر بن بدران هو اللي كان عقيد الدواسر في ذاك الوقت وهو جد البدارين والبدارين توهم مبعد تكونوا

الدواسر خلال ذاك الوقت ينعرفون بعيال سالم وصهيب ابناء زايد

والعشرة من المصارير التغالبة

ولاكان فيه تفرع للفخوذ خلال ذاك الوقت

وكيف تقول ان الركوز غزو المساعرة والوداعين !! وتوهم مبعد جاو

حتى ان بعض فخوذ سبيع توها ماتفرعت في ذاك الوقت وانت ابخص مني في قبيلتك!!

وبعدين ابناء وسيم العامرية وربعها ماغزهوهم الدواسر بذنب غيرهم

وانت تتساءل ليه يوم ان الدواسر غزوهم في اول ايام العيد!!!وانت تظن انهم يبغون يفاجؤونهم بدون مايحسون

عادة القبايل في السابق انها تستعرض عتادها وفرسانها في الاعيادوتتفاخر بها وسبيع ربع العامرية في صباح يوم العيد كانوا مسرجين خيولهم ومرتبين هجنهم وركابهم احتفال بيوم العيد
يعني خلال ذيك اللحظة لو تعرضو لغزو بيكونون مستعدين.
وكانو متزينين ومحتزمين بسلاحهم اللي في وقتهم للعيد

وانطلقلوا الدواسر بقيادة عامر بن بداران ويليه ناصر المبيعيج وخذت مسافة السير فترة زمن يومين اوثلاثة تقريبا

وكان احد رعيان سبيع يلمح توجههم وعجتهم على مسافة يوم . وحدة البصر كانت قوية عند الاولين

لكنه ماكان متأكد انه غزو وظن انها قطعان من الوضيحي لان فرس ناصر كانت وضحى تميل للبياض

ووراها كانت العشرة من خيول المصارير فاشتبه عليه الامر

ونبه من حوله من معازيبه وجماعتهم وبعضهم رد عليه وقال انت بلا تتوهم ماغير اللا قطيع غزلان

ويوم شرفوا على ديار العامرية رتب عامر بن بدران الخطة وخط الخط لكن ناصر والمصارير بعجوا الخط وسمي بعدها بالمبيعيج وبدت المعركة وانتهت بنصر الدواسر وهذا حال القبايل يوم انتصار ويوم خسارة
ولاهيب عيب مادام ان القبيلة متمسكة بالاعراف والسلوم الطيبة وعراقة اصولها

والدواسر وسبيع قبايل عريقة يملكون السلوم الطيبة ويحتفظون بقيمهم وعاداتهم


حنا بني زايـد بـزود فعولنـا = والزايديـة كـل يـومٍ بـزودهـا
نفعـل بفعـل جدودنـا ونزيدهـا = حيث الضرايـب تتبـع مهدودهـا
حنا هل البل مـن قديـم وحاضـر= فنس الخشوم اللي زيـانٍ خدودهـا
تفرح بنا لا صاح صيـاح ريبـة = لا حنت الفاطـر تبـي مفرودهـا
نلحق على قـبٍ سكنـا ظهورهـا = كن السهـوم المطلقـات جسودهـا
ولا من رمـت بقناعهـا الزايديـه = وعلى جثيل المال ساقـت قعودهـا
نـورد الاسيـاف بيـضٍ لوامـع = ونصدر الاسيـاف حمـرٍ حدودهـا
خيالـة الحرشـا ونعتـزي بـهـا = عـزوة حـرارٍ مرثتهـا جدودهـا
وخيالـة الجدعـا وهـي عزوتنـا = ولانفخت بعـض الرجـال لغودهـا
وراعي صخاف الشول سيفٍ قاطع = لامن انتخى صاب الخيول جمودهـا
نرعى بها غصبٍ على كل حاسد = يبـرى لهـا خيالهـا نمـرودهـا
وفرسانها من دونها تنطح ا لعـدا = باللي تقص الراس مـن جلمودهـا
حنا هـل القيمـه رجـال الشيمـة= دواسـرٍ كسـب الثنـا مقصودهـا
الزايـدي والتغلبـي مـن دوسـر = تاج الفخر ملبوسها من صمودها
نحـب نكسـب كـل علـمٍ طيـب = سوالفٍ يازيـن قطـف ورودهـا
اهل الحسب واهل النسب والشيمة = نعطي الرجال حقوقهـا ونزودهـا


تحياتي

[العماني]

يوم شعف اللي كسر فيه الدواسر وذبحت سبيع منهم الكثير.
2_الحويا الثانية اللي قتل فيها عقيد الدواسر الرديني على يد خالد السوده السبيعي واللي عزوته تعرفها الدواسر اهل الوادي وانشد جدك عن راع الشعثا.
3_قوز كمهان بين الفراعنة من سبيع والدواسر اللي ذبح فيها مية وعشرين دوسري ورووسهم يعرفها القوز .


الأخ السبيعي ممكن توضح لنا تفاصيل ذي الهيات وتذكر قصايد ، لأن السوالف بدون قصيد لا تثبت ولا يأخذ بها.



المغترب

الله لايهينك وترى هية برك كانت على سبيع ومعهم سهول .


وكان احد رعيان سبيع يلمح توجههم وعجتهم على مسافة يوم . وحدة البصر كانت قوية عند الاولين
لكنه ماكان متأكد انه غزو وظن انها قطعان من الوضيحي لان فرس ناصر كانت وضحى تميل للبياض
ووراها كانت العشرة من خيول المصارير فاشتبه عليه الامر

أحب أوضح ان الراعي السبيعي عرف انها خيول ابن بدران لأن خيل ابن بدران وربعه معروف انها بيض ، لكن السبعان كذبو راعيهم وقالوا يمكنك شفت قطعان الوضيحي.

السالفة والقصيدة موجودة في كتاب((من آدابنا الشعبية في الجزيرة العربية)) الجزء الثاني ((شاعرات من الجزيرة)). للشيخ منديل الفهيد الأسعدي

[ولد المبيعيج]

لاهنت ونا خالك على الاضافة

ونتمنى من السبيعي فعلا انه يجيب دلاليل على الوقعات اللي ذكرها ومدعومة بالقصيد

[محمد العاقل]

انا محمد من البدارين اللي جبتوا طاريهم بالموضوع ولكن هذي احداث ماضية من مئات السنين وانتم

تهاوشون من انتصر وكم ذبح من الطرفين كان الدواسر والسبعان ماهم عيال عم ودين واحد ووطن

واحد .

يالسبيعي لو ان الدواسر مابهم خير ماناسبتوهم ويالمغترب لو ان السبعان مابهم خير ماناسبتوهم .

وبعدين تقول يوم العريق فازوا السبعان او الدواسر مايهم ماهي معركة بدر او احد عشان تفتخرون

والله وجا اليوم اللي نفتخر بقتل بعض ياعرب ولكن مااقول الا الله يهديكم بس.

اخووكم العاقل محمد ........

[سبيعي واقعي]

ياسبعااااااااااااااااااااااااااااااااااااااااااااا اااان ويادواااااااااااااااااااااااااااااسر كفى فخر بقتل بعضكم البعض وصح لسانك يامحمد البدراني يوم تقول ماهي معركة بدر تفتخرون فيها قالوا العريق والحويا ما قول غير الحمدلله والشكر اذا فيكم خير حرروا القدس والا الفلوجه بس تكفون خفوا على اليهود(لانه مشكله اذا زعلتوا ياسبعان ويادواسر مايردعكم احد).

انا ماقصد التجريح او الاساءة لكن هذا الواقع الحاصل الناس وصلوا القمر وبياصلون المريخ وانتم مع البيعيج ناصر وخالد السوده ماقول غير الله يرحمهم حدتهم الحاجة على الغزو والا لو يدرون بفعايلكم التافهه (مع احترامي الشديد لاقبيلتين) انا سبيعي و الدواسر اخواني وبينا وبينهم نسب وعلاقات وكلنا مسلمين.

بعدين اذا كان ولابد من الفخر ياما تحالفوا السبعان والدواسر ضد الاعداء افتخروا بهذا .

انا اسف اذا قلت شي يزعل الطرفين تسامحوني ولكم مني جزيل الشكر.

اخوكم محمد السويدي السبيعي................................

[الدوسري الواقعي]

صح السانك يا البدراني ويا السبيعي الواقعي وخلكم أكبر من كذا وأنتم اخوان في الأسلام قبل ما تكونون حبايب و نسايب وحتى لو انتو منتب نسايب خلكم رجاجيل بدال ما تدعولهم برحمه والمغفرة وتكسبون الأجور من رب الجور والله ثم والله إنهم محتاجين الدعاء ويا المغترب ويا السبيعي (الله يرحم والديكم)ومن يشاهد تذاكرو بالخير يذكرونكم الناس بالخير.


والله إني احبكم في الله


الواقعي.................

[ولد المبيعيج]

اشكر اخوي محمد العاقل وسبيعي الواقعي والدوسري الواقعي

الله لايهينكم جميع ردودكم هي عين الصواب والله يكثر من امثالكم

ردودي ياخوان ماكانت تحيز ولاعنصرية والمواضيع هذي لاهيب مبلغ علم ولا غاية

السبيعي الله يجزاه خير كان رده غير مقبول والمشرف حذف العبارات الغير مقبولة من رده وكنت متجنب الاساءة في الرد ولا حاولت اني اذم سبيع بسبة غلطة شخص مندفع لان كلمة الحق مطلوبة وكل ناس فيهم الخيب والطيب حتى من ابناء عمومتنا القريبين والبعيدين.

ومنتدى سبيع الغلبا في احد الفترات صار فيه مهاترات بشكل كبير من عدد معين من الاعضاء

ولا نعمم على الاعضاء كلهم

فصار فيه كلام متجاوز لحدوده لعدد كبير من القبايل مثل الدواسر وعتيبة ومطير وكلام ماله حد ولاله رد وكلام فيه احياء للنعرات والعنصرية

حتى ان بعض اعضاء منتدى الغلبا وقفوا وقفة حق ضد من اثار هذي المواضيع اللي منهم وفيهم في منتداهم ولا رضوا باللي يصير عندهم وصار فيه تعارض بينهم بسبب ماقيل

ومواضيع مثل هذي حتى وان كانت تحمل المصداقية والواقع لابد انه يكون فيها اثارة للعصبية والعنصرية

واشكر الاخوان اللي سعوا بالفكر الطيب في الحد من هذا الموضوع واللي كانت ردودهم ترفع الراس

تحياتي

[ابو زيد الغييثي]

هذا الموضوع مغلق