اطرف موقف في حياتك

[اسد من الصحراء]

في هذا الموضوع ابي من الاعضاء كتابه اطرف موقف مر عليه
بم اني بدت بلموضوع اطرف موقف مر علي وما نسيته في صلاه الفجر
قومني الشايب وتوضيت ولبست ثوبي ورحت اصلي ولحضت ان الشيبان
يشوفوني و العيال يضحكون لدرجه فيه واحد يتسنن خلا السنه وراح بضحك براء استغربت ووسوست قلت يمكن اني مسوي شي غلط وانا ما ادري جيت ابي
ادخل يدي في مخباي مالقيت المخباء فلقيت اني قالب الثوب وانا مادري
فرحت دوره المياه الله يكرمك وزينت الثوب بس الشباب بعد الصلاه ماخلوني ذا يضحك وذا يتريقبس المشكله الشايب استلمني تهزى
يا الفاغر يا الداجه ومن هذا القبيل
ارجو ان يحوز الموقف على اعجابكم

[المشرف]

تبي الحقيقه مالوم ابوم يوم يقول لك يالفاغر

لعنبو بليسك قالب الثوب شكلك ماتشبك الازره

[هاب الريح]

اطرف موقف حصلي

كان ايام التقديم على الجامعة بعد التخرج من الثانويه

طبعا هذاك الوقت كنت نايم بدري عشان وراي تقديم الساعه خمس الفجر بالكلية العسكريه
ومخلي الشباب سهرانين عشان يصحوني وما يفوت التسجيل

ومن زود الحرص مخلي جنبي ساعه منبه (( خراش )) وكنت مضبط الساعه على اربع الفجر
عشان اصحى
ويوم جات الساعه اربع ودقت الساعه طبعا وقتها كنت في سابع نومه وما صحيت على صوت الساعه
وسمعوها العيال بالغرفه الثانيه
وجاوني العيال كلهم يبون يصحوني

المهم قال واحد منهم هيه انت قم يالله قم
وهو يصحيني انا اسمع صوت جرس
المهم واقوم والقط الساعه المنبه وحطها بأذني احسب انه جوالي يدق
هههههههههههههههههههههههههههههههههههههههههههههههههه ههه
هههههههههههههههههههههههههههههههههههههههههههههههههه هه
طبعا كل هالسالفه قدام الشباب

[شجن الصمت]

بعد موضوعي الاخير انا نويت ماعاد ادخل المنتدى
او ادخل بس ماعلق على أي موضوع
لكن شدني العنوان ومااااااقاومت
لانه
طرى علي موقف يموت من الضحك
بس تحملوا ترى موقفي طويللللللللللل مررررررة
وشو الموقف .. بقول لكم
طبعا كلكم تعرفون الشاعرة الكبيرة والمحترمة جدا
تذكار الخثلان
هي الان مديرة منتزة الخيمة النسائي بالرياض
المهم
انا كانت تربطني فيها علاقة صداقة قوية توطدت ايام الحمادي لما كان ماسك منصب رئاسة جريدة الرياضية وكانت تذكار ماسكة اعداد صفحة شعرية بالتناوب مع الشاعر العنزي
المهم.. وكنت اننا حيانا احيانا اساهم معها باعداد صفحتها بمواضيع بسيطة جدا
المهم .. زي ماقلت لكم كانت علاقتي فيها قوية لكن عمرها ماشافت خشيشتي المملوحه ومرة من المرات رحنا المنتزة على غير ميعاد وتفاجئنا ليلتها ان فيه امسية للشاعرة / عيون المها لكن قبل تبدا امسيتها سوووا فقرات مسابقات شعريه وفكرية وكان فيه مسابقة كل وحدة حاظرة تقول قصيدة وتذكار والجمهور يقيمون << انا ماكنت اعرف ان تذكار موجودة لاني ماعرف شكلها رغم انها طول الوقت قدامي وماعرفتها الا لما سمعت المقدمة تقول لها تذكار يا تذكار
انا فرحت وسالت المقدمة هذي الشاعرة تذكار الخثلان
قالت : ايه
قلت : متأكدة
قالت : ايه ياقلبي ليش ؟
قلت وانا اضحك : لا بس انا اعرفها واكلمها واول مرة اشوفها
قالت من انتي تقربين لها
قلت لا انا شاعرة وهي عارفتني بس مابعد تلاقينا
المذيعة اجودية قالت تعالي اعرفك عليها
ومسكتني وراحت تذكار وقالت لها اسمي وانا واقفة
ضحكت تذكار وجت وسلمت علي وسولفنا شوي ثم قالت لي
لازم تشاركين الليلة بقصيدة
ضحكت وقلت بجراءة من عيوني
ثم رحت وجلست جنب خواتي وعمتي.. طبعا خواتي وعمتي لما عرفوا انها تعرفني كشخوا فيني ولقصوا صارت كل وحدة تقول فلانة تعالي جنبي ومن اول يطردوني من جنبهم يقووووووولون حر وخري
المهم
جلست ولما بدت المسابقة اللي هي كل وحده تقول قصيدة لها
اشرت لي تذكار ثم قالت للجمهور وهي تقدمني ؛ (بحاول اتذكر كلامها )
والان مع شاعرة قادمة بقوة << لبى القدوم
شاعرة متميزة في لوحتها الشعرية
شاعرة اتت من عبق القرى <<< فشلتني دروا اني بدوية هههههه = امزح مهوب يجي واحد بكرة ويناقز <انا عزي وتاج راسي البداوة)
شاعرة اتت من عبق القرى لتفرض نفسها بثقافتها بعلمها ولباقتها وابداعها علينا جميعا فنصغي لها بشوق واهتمام
والان مع الشاعرة (ماقالت اسمي الحقيقي قالت لقبي الشعري)
المهم كان حاظر معنا بالملاهي ناس دواسر من الديرة عرفوهم عماتي وتعرفون طبعا الحرج اللي حنا وهم فيه هم مسوين نفسهم ماعرفونا وحنا كذالك
المهم فلما وقفت حتى القي القصيدة خواتي كانه همهم شكلي والتنورة اللي تقول انتبهي لا يطلع ظهرك وللي تقول وقفي برزة وارفعي رقبتك لا تدنقين اما عمتي فغمزتني بيدها وقالت شوفي ال فلان حاظرين وتراهم هناك (تشر عليهم) فلا تفشلينا قولي قصيدة زينة ومافيها حب ولا فيها مغازل
ضحكت وقلت ابشري ماعليك ان شاء الله بابيض وجوهكم
رجعت وقالت :: الله الله امنعينا من الردى والمغازل مانبيهم يحكون بك في السليل بنت ال فلان تقول سذا وسذا يعني ( كذا وكذا)
انا سكت ورحت منها وانا امشي كنت محرجة وافكر وش باقول لاني طول الوقت اجهزي قصيدة غزلية وعمتي فاجئتني بنصيحتها فقررت اقول قصيدة في ابوي الله يرحمة كتبتها يمكن قبل 4 سنوات من روحة المنتزة وتقريبا ناااااااااااسيتها
بس اني اذكر البيت الاول وكنت متفائلة ان قريحتي مهيب مفشلتني واكيد اول ماوقف واقول البيت الاول تلقائيا بهل الباقي من القصيدة
طبعا قصيدتي كانت عبارة عن 3 اقسام
الجزء الاول في الوالد
ثم في اختي
ثم فيني
احم احم .. حان وقت اللقاء وقفت امام الجمهور
قالت تذكار تفضلي وعطتني المايك
مادري وش جاني لما شفت الناس ... نسيت كل شي حتى البيت الاول من القصيدة نسيته ثم فكرت اغيرها بقصيدة ثانية
بس وين ويلي ربعنا اللي من الديرة وويلي عمتي اللي طول الوقت تشر بيدها لي >>> امنعينا من الردى ولا ذبحتك
المهم توكلت على الله وقلت احم احم << احاول انعم صوتي
مساء الخير .. انا والله مبسوطة اني الاقيكم بهالليلة الحلوة خاصة بوجود الشاعرة عيون المها والاخوات الشاعرات وكذاك الصحفية المبدعه جواهر على ماعتقد من جريدة الجزيرة << الله يغفر كنت اتلاوق لها ولا والله ماعرفها الا لما شفتها أبيها تمدحني ..
اكمل لكم كلامي
وطبعا بوجود اختي وحبيبتي الشاعرة تذكار الخثلان
>> يالله عاد قولي الدرر وخصلي هالناس الجو صيف والناس محرورين
طبعا قصيدتي بعنوان يابوي وهي عبارة عن 3 اجزاء في الوالد الله يرحمه واختي وبلاخير اتكلم عن شخصي
>>> يمه يمه انا قاعدة اطولها ابي اتذكر البيت الاول الله يقطع ابو شكله عيا يطلع ... اه ياقلبي .. وجهي بداء يتسلخ
الحمد لله ذكرت المقطع الاول
يامرحبا فيك صبح وعشية ... يابوي يابـــوي يانــور ذا البيت
بشروني بك كل الرعيه ... وقلت اهلا هلا عد ماجيت واقفيت
... هنا غرزت نسيت اللي بعده ..
فقلت معليش انا ناسية القصيدة لانها مررررررة من زمان كاتبتها << على بالي اتدلع
عموما البيت اللي بعده اقول فيه
ياجعل رجلي رجلك ضحية ..
احم معليش والشطر اللي بعده نسيته ثم قلت في البيت اللي بعده
عساك لا قلت الاه حسيتها فيه
أأأأأه .. ياوجدي << انا وش قومني من مكاني
انواع اللخبطة .. و العرق بدا يتصبب
ناظرتني تذكار وهي تقول الله الله !! .. انتظروا شوي بيجيكم الدرر على ضمانتي شاعرة قنبلة الليلة >> اه ياوجدي
انا ابتسمت وقلت لها معليش القصيدة مررررة مبطيه عنها >> على بالي من كثر القصايد
تذكار ماقصرت قالت تكتفين بهالبيتين
فقلت من العتاره : لالالالالالالالالا عادي بكمل بس ابي اتذكر
>> ماصدقت امسك مايك واقول قصيدة والناس تسمعني
فقالت خذي راحتك حبيبتي
رجعت اناظر الناس .. ابي اتكم
أم .. اأأأأأ ... ام .... >>> ماش كليت تبن ولا كلمه طلعت ..
تذكار لبى قلبها قالت مدامك ناسية ياقلبي هالقصيدة قولي ثانية انتي ماتذكرين شي من قصايدك اللي قلتي لي انا عارفة انك شاعرة مبدعه وعندك اشياء حلوة
فقلت الا اذكر عندي قصيدة غزلية تو كتبتها
فقالت حلو قوليها
ناظرت عمتي .. وتذكرت كلمتها (امنعينا من الردى) ..
فقلت : لا لا خلاص
قالت تذكار : عادي وراك .. ناسيتها!!
قلت لا بس ماقدر ..
ثم شاورتها وقلت : قرايبنا هنا موجودين
الحرمة اجودية ماتعرف حركات الخش والدس عندنا
فقالت : حلو مدام قرابيك موجودين هذا اكبر دافع حتى يشوفون ابداعك
فقلت : هااااااااااها حليلك ماتدرين .. الا على طول يشتغل النقد بنت ال فلان كاتبه تغازل << اه ياوجدي حتى الخيال بالقصايد حررررررررررررررررررررام
المهم
انا لازلت واقفة والناس كلهم ماغير كور كور كور يضحكون علي << وع فشيلة
تكفون ليتكم تشوفون كيف شكل تذكار
احسها انحرجت مني و
واهلي عاااااااااااد ودهم ياخذون نعلاتهم يفقعون وجهي
اه .. واما أنا لحالي قصة من الحزن والفشايل
والله ودي ابكي لين يطيح مافي راسي
ودي انخش
ودي تنشق الارض وتبلعني ..
اه .. ياوجدي
المهم طلعت وانا مثكله بالجراح والفشايل و جيت اجلس جنب خواتي .. كلوني بالسنتهم وش فيك كليتي تبن .. فشلتينا .. الله يقطع وجهك ..
وعمتي عاد بالنظرات .. شي !! ماغير عيونها تقول : يامال قصاف الارواح .. >>> يعني الموت
اه .. ياكبدي ..
لا طاح الجمل كثرت سكاكينه ...
المهم ..
رجعت وانطميت بمكاني وانا اتبسم من الفشايل <<< يعنني عادي
لما انتهت الامسية
تذكار لبى قلبها نادت الشاعرات (طبعا كانوا الشاعرات والصحفيات جنب بعض )
تذكار مانستني .. جت لمي ونادتني الا تجين معانا في غرفتها
انا افتشلت وقلت لا والله
قالت تذكار .. الا لازم خلينا نتعرف عليك من قريب.
بصراحة .. انا كنت متشققه .. من الوناسة بس اتثيقل واحسها رزة وهي تناديني عند الناس وانا اسمعهم كلامي وانا اعيي واقول : لا والله ياقلبي >> انعم كلامي يعني ادرو اني شاعره كبيرة ومهمه
تذكار على نيتها تقول : الا لازم تجين
عاد انا ويلي على الروحة معها .. هناك مجهزين عصير وحلويات ضيافة بالعربي فلة حجاج
المهم
سويت نفسي مستحيه ورحت معها ...
دخلنا وجلسنا سوى طبعا انا الجديدة بينهم وتذكار تعلمهم بعلومي يعني ابداعتي في الشعر واشياء ثانية مانيب معلمكتم بها ...
هنا خذيت راحتي وقعدت وفليت عليهم شريط قصايدي الغزلية كلها بلا حرج ياسلم لم لا ناقد ولا منقود وبعض قصايدي في القبيلة واهلي << هالقصايد من البدايات ومن ذكريات الصبا لان اول ما الواحد فينا يكتب الشعر مايخلي احد من اهله ياصل في كل قرايبه بالقصيد جده جدته ابوه خاله عمه بياع الدكان الا ويكتب فيه قصيدة اما انا حتى البقر والغنم وصلت فيها وقلت لي قصيدة >>>> فوران بالطاقة الشعريه هههههههههه
المهم
قالت لي احد الشاعرات : الله مدام شعرك بهالحلاوة ليش ماقلتي هالقصيدة لما طلعتي ..
هنا انا تفاجئت بالسؤال بس الحمد لله لقيت لي مخرج ..
فقلت بنعومة << احم والله عمتي هي اللي اختارت هالقصيدة لانها بالوالد الله يرحمه ..
بس الصحفية الملقوفة فاجئتني بنصيحتها وقالت : طيب ياعيوني مدام القاءك حلو ورى كنتي شوي متلعثمة ليش انتي مو حافظة قصيدتك ترى الشاعره المتمكنة هي اللي تحفظ قصايدها..
انا هنا كنت ابي القى لي عذر وكنت ادور لي أي عذر يطلعني لاني احفظ قصايدي بس ذي بالذات نسيتها لاني مبطيه عنها كثيررررررررر
المهم وانا اقلب القريحة بحرج ابي عذر
لبى قلب تذكار فزعت لي دون قصد وانقتني من الاحراج وقالت : لا هي ماشاء الله دايم اذا كلمتني تقول قصائدها عن ظهر قلب بس يمكن لان موضوع القصيدة حساس بالوالد الله يرحمه ويمكن هذا اثار احزان شاعرتنا الصغيرة >> كنت توي بمقتبل العمر ..
المهم انا لما سمعت كلام تذكار تفاجئت
وقلت : هاه .. هاه ... ايه .. ايه .. ايه وقمت اهو هو كني كلبه <<< طبعا عشان يعني على اساسا لازلت متاثرة بوفاة ابوي الله يرحمه تمسكنت وشينت وجهي << خلقه شين هههههههههههههههه استغفر الله
قعدت معهم شوي ثم طلعت عشان انا جيت الملاهي عشان العب واناقز بحريه مهوب اقعد على كرسي واظطر اسوي فيها وحدة من طبقة المثقفين المعقدين ..
وسلامتكم
هذا كان موقفي
بس ابي ازيد عليه سر خطير والله على ماقول شهيد
الاول :
تذكار كانت ماسكة صفحة الشعر بالصفحة قبل الاخير بالرياضية لو تذكرون لمدة 2 سنة كامله ايام رئاسة الحمادي قبل ينتقل لرئاسة مجلة الفروسية وطبعا كان معها كوادر نسائية كثيرة بس طبعا بالمراسلة يعني ماكانوا يجون مقر الجريدة المهم .. الحمادي لما قرء بعض نصوصي وبايعاز من تذكار قرر يعطيني زواية كاتب فيها مقالات بعدين بانشرها لكم مع الاشراف على ركن بالصفحة الاخيرة لو تذكرون اللي اسمه همسة شعر وكان فيها صورة عين وحده بلثمة وتحت هالركن لازم بيتين شعر يوميا
طبعا هو طلب مني كذا اليوم
اقسم بالله العظيم ماجاء بعده بيومين الا والامير احمد بي سلمان يقيله من المنصب ويعين المهدي (طبعا كان متعصب شديد ضد قلم المرأة وغير مقتنع فيه لذالك طرد كل النساء اللي كانوا يكتبون في الجريدة من ظمنهم حضرتي أهي أهي أهي)

الثاني
الموقف الثاني :
تذكرون فورة الاسهم اللي طلعت قبل سنتين لما وصل المؤشر الى 18 وتعدى وقالوا محتمل يوصل الى 20 ..
المهم
الناس انهبلوا واللي بيع ماوراه ودونه حتى يساهم طبعا انا قلت بنفسي مانيب التالية وقررت اساهم << اه ياوجدي
بس ترددت وين اساهم بالمباشر ابيع واشري ولا بالصندوق والمحافظ << قالت لي وحدة المحافظ ابرك لك يبيعون ويشرون وانتي راقدة على مدتك
فقلت خلاص مابدهاش والله ورحت وشريت بالمحفظة صندوق الاسهم المحلية بالراجحي بمبلغ وقدره %عفوا %
اقسم بالله شريت السبت الاثنين طاح السوق طيحته ذيك اللي مابعد قام منها الى الحين
اهي اهي اهي
المصيبة اني شريت والمؤشر تقريبا وصل 18 و طلح لين دق وصل 6 >> يالله الاروح تروح جت على الفلوس
عاد انا قلت هالموقفين مهوب يعني اني نحس لا والله انا حبيبة بس مادري ورى الحظ يعاندني
وعلى قولة البدر
كل مادقيت في ارض ٍ وتد ؛؛ من وفاة الحظ وافتني حصاة

يالله ياحي ياقيوم تقعد حظي وترجع الغايبين اثنيناتهم بالسلامة وتقومني انا بالسلالالالالالالالالالالالالامة

تحياتي لكم
في امان المولى

[هاب الريح]

روعة يا شجن الصمت
كنت اقرا بتمعن وسعة خيال
موقف طريف جدا ويمكن يكون محرج اكثر من انه
مضحك
ولكن كلامك هذا دليل على اننا كسبنا عضوه مهمه للغايه
ومثلما ذكرت لكي
نحن لانترك للمبدعين فرصة لكي يناموااو يهربوا

[أبـــ مبارك ـــو]

ههههههههههههههههههههههههههههههههههههههه
ياشجن الصمت موقفك جميل جدا ولكنه طويل لدرجة اني قريت نصه وكملت الباقي لما قمت من النوم
وعلى العموم شكرا لك على ابداعك المستمر وتميزك الذي بلا حدود
تقبلي تحياتي

[شجن الصمت]

معليش حبيت انوه ان هالموقف قديمممممممممممممم جدا تقريبا من 3 سنوات بس لانه جدا محرج ويموت من الضحك مانسيته وباقي الى اليوم اذكره وافطس من الضحك

[المشرف]

اثاريك مبدعه حتى خارج حدود السليل

موقف من جد محرج للغايه بس شكل تذكار تعزك لانها انقذتك اكثر من مره

بالتوفيق لك

[هاب الريح]

اشوفكم
مزلبين موقفي ما احد ضحك منه
خير هجل هو بايخ ولا ماتبون تضحكون يعني الدعوى عنااااااااااااد

[السعدي]

اشوفكم
مزلبين موقفي ما احد ضحك منه
خير هجل هو بايخ ولا ماتبون تضحكون يعني الدعوى عنااااااااااااد



حبيـّــبي هاب ريح
هههههههههههههههههههههههههههههههههههههههههههههههههه ههههههههههههههههه
عشانك
والله موقفك يضحك خاصة الخراش اللي لقطته
هههههههههههههههههههههههههههههههههههههههههههه




اخت شجن
ههههههههههههههههههههههههههههههههههه
موقف محرج ومضحك في نفس الوقت
ههههههههههههههههههههههههههههههههه

[هاب الريح]

السعدي
ما شاء الله سشكلك مسجل هنا بالمنتدى بس عشان تضحك من الموقف
ههههههههههههههههههههههههههههههه
اشوفك على طول اول مشاركة لك
عموما حياك الله في منتداك واهلا وسهلا وهذي الساعة المباركه
اللي ضحكناك ورحبنا فيك

[المتيم]

كنت ناااايم يووم صحيت لقيت نفسي صاااحي ياحليلي

ههههههههههههههههههههه ه
هههههههههههههههه
هههههههههه
ههههههه
ههههه
هه
ه
محبكم: الهميلي

[صمت المشاعر]

هبهوب
شجن
من جد عليكم مواقف ولا في الخيال

[المشرف]

اشوفكم
مزلبين موقفي ما احد ضحك منه
خير هجل هو بايخ ولا ماتبون تضحكون يعني الدعوى عنااااااااااااد
موقفك مايضحك
يخلينا ندعي ان الله يشفيك
ويعافيك

تدري ليش لانك لو استمريت على هالحاله احتمال تصاب بمصيبه اكبر
يمكن طال عمرك تظطر تكوي ثوبك لان الخدامه مشغوله ولامعك وقت تروح للمغسله ثم يرن جوالك وبدل ماتحط الجوال تحط المكوى على خدك ثم عاد تعال رقعها