فهد الفحيل
17/07/2007, 20:11
السلام عليكم ورحمة الله وبركاتة ابطال القصة – فهد الفحيل – محمد مبارك بن صبران واخوه عبدالله اروي قصتي التي غيرت كثير من وجهات نظري حول موضوعي الاول اذا تهت في الصحراء الداية – صممنا إلى الذهاب للرملة بعد مجيئنا بيوم من خيبر الجنوب التي لم نستطع الصيد فيها بوفرة بسبب وعورة المنطقة وقلت الصيد فمكثنا فيها يوم واحد ثم رجعنا ادراجنا إلى السليل وفي اليوم التالي بعد صلاة العصر توافينا عند الشايب مبارك بن صبران للقهوة واخبرناه وجهتنا ( ورى مشروع الهجاج من 60 الى ال100 كيلو وقلنا له بالحرف الواحد اذا لم نأتي بكرة الساعة 7إلى 8 الصباح فنحن متعطلين اسعفونا وكان هذا احسن مافعلناه باخباره عن وجهتنا طبعا الماجلان معنا ومحددين فيه اماكن اثار الارانب في الرحلات السابقة والثريا كلم عبدالله صاحب الثريا وقال طيب تجونني عند المصلح يصلحه بس ابي منكم ربع ساعة المصلح دايم يصلحه في ربع ساعة عبدالله من العجله قال الثريا خربان على شان مايعطلنا وهذا اول غلط هو الاستعجال طبعا زهبنا العزبة حق وجبتين ثلاث وحطينا في الترمس كيس بلور واحد فقط مع بعض المشروبات الغازية و دبه لبن وهذه الغلطه الثانية الماء البارد كيس بلور مفروض نملا الترمس قوالب ثلج لانه يبطي مثلج وارخص الله الرخيص الماء هي دبه ماء 22 لتر منهل ام 6 ريال و22 لتر اخرى بنزين وبعد الساعة الخامسة عصرا انطلقنا وقبل مشروع الهجاج وافينا خالي عبيد بن شماء متعطل بسبب بنشر وصلحنا كفر موتره وتعالمنا وياه وهذه ميزة اخرى حيث اخبر الربع الذين بحثو عنا بوجهتنا تحديدا حيث تركنا مشروع الهجاج على يسارنا بكيلو ونصف واتجهنا جنوب شرق وكان الجو هواء وذاري يعني الثر للصيد مستحيل تشوفها وثر السيارة تروح جرتها بعد ربع ساعة بالكثير وجدنا الزهره بكثرة وهي نبته تحبها الارانب ولاكن لاوجود للثر تعدينا الشقه الثانية من موقعنا بالماجلان ولاكن لاوجود سواء للعقارب والديبان وتعديناها للشقة الرابعة وحين نزولنا بالسيارة نفجت الارنب الاولى وبعد المطاردة اذ بالثانية فتوفقنا بصيد الاولى ورجعنا نبجث عن الثانية فرزقنا بها فاصبح الحصيلة ارنبين وقفنا وزينا العشاء وتعشينا قفضنا العزبة وكنا سننام وبعد صلاة الفجر سوف نسوي مسحية بكفرات السيارة لان أي ارنب تقطع المسحية في هذا الوقت المتاخر سوف تكون رابضه قريبا لكي تنفج في الصباح ولاكن بعد العشاء قلنا مالنا مجلاس في هذا الذاري والهوى لان لو نمسح بيروح الثر سواء اثر السيارة او الارنب فقررنا الرجوع للسليل وكانت الساعة تشارف 11 مساء رجعنا تبثى حوالي 36 كيلو على مشروع الهجاج ذبينا عرق شيز فغرزة السيارة وكانت تحتنا حقنة عشقنا الدبل فلم يتحرك الموتر سواء بالثقيل او الخفيف ايقنا ان الدبل خرب حفرنا للسيارة وكان الرمل مغطي بطن الموتر حفرنا حتى كنا ندخل من جهه ونطلع من تحت الموتر من جهه اخرى ولاكن لم يتحرك الموتر قيد انمله كان الكفر الخلفي واحد يدور بوش والاخر متكي مايتحرك حولنا ولاكن لاحياة لمن تنادي وبعد ساعتين من العمل المتواصل قلنا بننام واذا صلينا الفجر بنحاول قدامنا ساعتين قبل الشمس وحرارتها صلينا الفجر وكنا تعبانين قلت يا الربع نكمل عملنا ونحفر قالوا بننام والموتر ماسكه سكن مستحيل يطلع وسحبناها نومة لين صحينا الساعة 7 صباحا صحينا من حرارة الهواء والتراب المتطاير على وجيهنا ( الذاري) طبعا جلسنا نتجلد ونبعد من الشمس وحرارتها وشربنا الحمضيات الي في الترمس والماء الذي في الترمس انتها الساعة 8 صباحا ولم يتبقى معنا إلى رطب ونصف دبة المنهل ام 6 ريال ماء حاااااار لم اعطي اخوياي سوى 5 رطب لكل شخص لان الرطب يسبب الضماء وحسب ماسمعت ان 3 تمرات تكفي ليوم واحد الساعة 9 اشتد الهواء والذاري ولم يبقى للسيارة اثار واصبحنا نغطي وجيها بالغتر لاننا لانستطيع ان نكشف وجيها للتراب وكانت الساعة تمر مرور اليوم وكنا لم نستدرك للخوف ولم نفكر فيه ولاكن بعد مرور الساعة والساعتين واشتداد حرارة الجو اصبحنا نقول ابصر بالماء لمن يشرب شوي شوي وكنت اقول لمحمد بن صبران شوي شوي على الماء اصبحنا نحسب ذنوبنا وكانت الساعة 12 الضهر نزلت ووضعت الترمس على قمة العرق وحطيت صحن الاكل المعدن يم الشمس لكي يسطع ويعكس اشعة الشمس اصبحة الساعة 1 ثم 2 بلغنا مابلغنا منا اليأس كنت اخبرهم ونحن في السليل ان بنتي تقول لي يا بابا ياحبيبي وكانت اعلمها الكلام لانها مازالت صغيرة ونحن نحسب ذنوبنا في التغريزة وإذ بمحمد بن صبران يقول لي من شنطة الموتر عزتي لبنتك من بعدك يافهد وهو يقول يا بابا يا حبيبي يا بابا يا دليبي ( قليبي) قلت ما تعض على شحمة وتاكل ترابك يعني تبغاني اموت ذي الموته وبعد زود عليها تشحني على بنيتي الارض لم نستطع الوقوف عليها لان الرمل اصبح جمر بل نار من شدة الحرارة مكثنا في السيارة ولم نصبح نتكلم وحين اصبحت الساعة 4 العصر نزلنا من السيارة وصلينا لضهر والعصر وذب محمد العرق لكي يزين الصحن الذي طاح من الترمس فإذ به يقول ابشروبهم فرمينا بالرشاش وإذ بالرماق والسفتي حق الدفاع المدني يرمي بصوته العالي في هذا القفر الخالي والجال المترامي وقف اول واحد علينا هو محمد بن حسن الشلدي وعياله ونزلو الماء البارد والعصيرات بانواعها واذ بولد فهد الشلدي واذ بالموتر الدفاع المدني وعليه ابن جاسر وابن جلوي نزلنا ندف الموتر ولاكن لاحراك فيه ربطناه وسحبناه من ورى واذ بالكفرات الامامية مشبصة درينا ان الدبل شاقص بالسيارة وبعد قليل نزل خالد عبدالله الهجاج ورفيقه الهويملي وعقبهم العريس ابن رتيبان وعقبهم مبارك بن صبران ووصل عقبهم الشايب عبدالله بن صبران ووصل عقبهم هندي بن زابن واكانت عدد السارات الواصلة لنا 7 او 8 سيارات سحبنا السيارة نبي الدبل ينفرط ويمشي ولاكن لم نستطع نزلو عيال الشلدي وفكو عامود الدبل وباقي صامولتين ولاكن ابن جاسر وابن جلوي فكوه بالعفرته نطلنا عامود الدبل في شنطة السيارة ووجهنا للديرة وكان العشاء عند الشايب مبارك بن صبران توفينا نحن ابطال القصة والمنقذين لنا والجماعة واهديت محمدبن حسن الشلدي رشاش لانه اول من وصل لنا واول من خلاني اطمن امي اطال الله في اعمار امهاتكم ويرحم ميتكم طبعا فيه اشخاص لم اعرفهم كانو قد اسعفونا --هناك بعض التوصيات يجب ان اقولها حسب خبرتي لاني اصبحت من ذوي الخبرة 1- الجاء الى الله عز وجل قبل كل شيى وعاهده على ترك معاصية واتباع اوامره فلم ينج اصحاب الكهف الا باعمالهم الطيبة 2- جهاز ماجلان والثريا للعطال او الضياع الثريا اذا تعطلت تقدر تكلم والماجلان يفيد اذا جاء عج او فيه غيوم فهو يفيد 3- توفير الماء البارد ترى قوالب الثلج رخيص ارخص مارخص الله لاتقول يوم وراجع احسب حسابك للعطال 4- الاخبار بالجهه فالبعض يواجه شخص وهو يريد الذهاب مثلا للشمال فيخبر الشخص عكس الجهه أي الجنوب وعند الضياع يفيد الشخص بانه ذهب للجنوب فيضيع عليه يوم ويومين في الجهة الجنوبية وهو في الشمال يجب ان تخبر عن وجهتك السليمة 5- حاول تكون طلعاتك البرية بسيارتين اذا تعطلت واحدة فالثانية موجودة 6- حاول ما تبتعد عن السيارة اذا كان هواك ماء وفير وغذاء لان السيارة واضحة للعيان واغلب من مات في الصحراء هو من ترك سيارته 7- اذا رئيت وميض نور فاشغل في استبنة السيارة نار لكي يشاهدها الباحث 8- لاتخف واخبر اخوياك بان كل نفس ذائقة الموت واذا لم تمت اليوم مت غدا ولاكن ادع ربك ان تكون موتتك هينة مريحة واهون موته