ابغى قصيده كل ابيها على الشين-للشاعر سالم بن جلعان

[المجمول]

لبيـش ياللـي قالـت اكتـب قصيـده=ابغى قصيده(كـل ابيها)علـى الشيـن
لبيش من شاعـر كتـب لـش جديـده=وجديدته لـش مثـل تـاج السلاطيـن
شاعرش شاعـر كـل شعـر ٍ يجيـده=يـوم اغلـب الشعـار يبلـش ببيتيـن
لـو فـي خفوقـش امنيـات ٍ بعيـده=بيجيبها لش قبـل مـا تطـرف العيـن
ولا الشعـر شاعـرش شاعـر وليـده=تخضع له ان جا الشعر روس الشياطين
ياللي على عـرش المشاعـر وحيـده=يـا خلطـة العنبـر ونفـح الرياحيـن
ياعطره اللـي ذاب فـي راحـة ايـده=واخفاه عن عيـن الوشـاه الحسوديـن
عطـر ٍ تغلغـل مـن يـده ليـوريـده=يجري مع مجـرى دمـه فالشراييـن
وعطـر سمـا جوفـه وذوب جليـده=حتى غدى جوفـه خضـار وبساتيـن
بعلمـش شـي ٍ لنفـسـي اعـيـده!=تدرين به ؟ لا والله ماأظـن تدريـن !!
من قبل اعرفـش كـان قلبـي حديـده=قاسـي ولا يدنـا كــلام المحبـيـن
متعجـرف ومتكبـر ومـن يصـيـده=وان ذكروا اهل العشق قال .. المساكين
وجيتـي وغيرتـي الطبـاع العنـيـده=ولينتي اللي مـا حسبـت انـه يليـن
بعد التعجـرف صـار ممشـاه سيـده=يبغى رضاش ويفعـل اللـي تريديـن
مشاعـره لاهـداب عينـش طـريـده=تنصاد لرمـاح الهـدب قبـل ترميـن
رمشـش عليهـا يامـر اللـي يريـده=وهي تلبي لـش بحاضـر .. والحيـن
ولش مع نظر عينـي حكايـه فريـده=ما زاد شافت من بعد شوفتـش زيـن
كنـش الأميـر اللـي عيونـي عبيـده=هذيك تدعي لش وذي قالت اميـن ..!!
الله يجـعـل خاتمـتـنـا سـعـيـده=والقاش ساعه والعرب عنـش ساهيـن
ساعـه بهـا نحيـي مشاعـر شهيـده=من قسوة الفرقـا ومـن طعنـة البيـن
وشوفي حبيبـش وش يسـوي بعيـده=لا صرتي الضحكـه بثغـر البزاريـن
تكفيـن خليـنـي وشــي ٍ اريــده=لا لا تردينـي وانـا اقـول تكفيـن !!
لاجل انثرش واجمعش كنـش قصيـده=مكتوبة ٍ لش كل ابيها علـى (الشِيـن )