لاوالله الا مالنا ذا اليوم في الطيب نصيب,,,,,,,

[السيف دايم]

السلام عليكم

كنت ليلة البارحه في زواج احد زملائي وكان معنا الشاعر سعد بن شفلوت وقام بالقاء عدة قصائد

والقى هذه القصيده من ضمنها فاعجبتني واحببت ان انقلها الى اخواني بمنتدى السليل,,

ويقول:
.

مناسبة هذه القصيدة اني انا وواحد من الربع ليلة من ليالي السنة الهجرية كنا في طريق الملك عبدالله على ايام مشاكل سجن ابو غريب وكنا نتحادث في الموضوع وقفنا عند احدى الاشارات الا وهذا الجيب بي ام فيه وحدة وحدة لاجت وحدة ولا راحت وحدة قطعنا الموضوع على طول وجلسنا نقز هذي المخلوقة ووصلتن بنا الامور الى انا تبعناها
وصار ماصار واليكم هذه القصيدة

((( بنت العيّا))))]


المشهد اللي صار بين احضان سجن ابو غريـب=
مصيبـة يـا كبرهـا ياعضمـهـا ياهولـهـا
تشيب منـه روس نـاسٍ مالهـا نيـه تشيـب=
شاب الطفل في ميزبـه والبنـت فـي هندولهـا
والنبت من زود الضمى ماضن يرويه أي شيـب=
والانعام قامـت مـن غبينتهـا تجـر ذيولهـا
والطير ضاق به الفضا والارض والكون الرحيب=
يبكي على السدرة وهي تبكي علـى غرمولهـا
حتى الثوانـي والدقايـق بينهـا امـرٍ عصيـب=
وايـام وشهـور السنـة كانونهـا ويلولـهـا
جف المطر والشمس غابت من قبل حلّ المغيـب=
والليلة الظلمـى علـى القمـرا تمـد سدولهـا
كم من بيوت من فراق اصحابها صارت عشيـب=
وكم من الافاعي موتت فـي سمهـا بدحولهـا
الغدر يرعد فالعراق ولـه صـدى فـي تلبيـب=
وبلـه عباريـدٍ تـرادم والـدمـيّ سيولـهـا
انا معك يا للي تقول ان ما على الدنيـا غريـب=
وخلك معي لا قلت لـك لقحـت بغيـر فحولهـا
فان كان فالدنيا عجيب فشي واحد هو العجيـب=
نـاس تهـل دموعهـا ونـاس تـدق طبولهـا
ناس على هرج السعه فمها وسيع تقـول بيـب=
وناس عن الموضوع كلـه سـدّ فمهـا فولهـا
وناسٍ سوالفها مابيـن حلوقهـا مثـل الدبيـب=
مثل الهنود اللي على السيكل تشيـل اسطولهـا
هم يحسبون ان القضيـة حلهـا بيـد الصليـب=
هم مادروا ان صليبها يامر علـى انتـر بولهـا
وانا بدون شعور قمت آصيح بالصوت الصليـب=
صيحة ورى صيحة واحسب ان العرب صاحولها
واثارني سواة مـن يزهـم ولا حولـه مجيـب=
وسواة من يـزرع بـذور ماجنـى محصولهـا
واما انت يامن قلت خلك مالسراه الـى طريـب=
في خاطري لـك كلمتيـنٍ مستحـي لا قولهـا
ان كانها هلّت دموعك من غنـا بـدر الغريـب=
فانا دموعـي مايغـرّك وش سبـب هملولهـا
لو ان عندك ذرة مـن الديـن يالوجـه الكأيـب=
ماقلت كلمـة وانـت مانـت بعـارفٍ مدلولهـا
ولاّ امّنا يشهد علي اللـي علـى خلقـه رقيـب=
نلت العلا يوم انت واشكالـك عجـزت تنولهـا
ولابـد ناخـذ حقنـا بالطيـب ولاّ بالغصـيـب=
لو ضحكت الدنيا لضحكتهـم وهـم ضحكولهـا
فان كنت عاجز تاخذ حقوقك فـوكّ لـك طليـب=
وخلك من المغرب ليـا باريـس لا سطنبولهـا
هذي قضيّة كنت اسولفها على سقـم الحريـب=
شيـخ علـوم المرجلـة تسمولـه ويسمولهـا
حسن سعيد معـرّب الجديـن والخـال العريـب=
ان عدّوا الزحول الرجال يعـد ضمـن زحولهـا
من لابةٍ يوم الملاقـا جرحهـا جـرحٍ عطيـب=
منديـةٍ حتـى العـدا بنفوسـهـم شهدولـهـا
ان كانها بالشر شـر وكانهـا بالطيـب طيـب=
ويقطـع رجـال ٍ فالملاقـا ماتشـاف فعولهـا
واثنـا دراستنـا القضيـة ياعساهـا للذهيـب=
نبي نفـكّ الشفـرة ونعـرف رمـوز حلولهـا
طحنا علـى عنوانهـا عنوانهـا افهـم يالبيـب=
غير العـرب مافهمـوا الطبخـة ولا فطنولهـا
وعلم طمر في علم وآخر علمنـا قصـة كليـب=
ساعة رواها مسنـدي فجـأة طلبـت عدولهـا
قال ايش علمك قلت حاجة تبري الجرح الصويب=
الناس مالت كـان تـدري وش سبـب ميولهـا
موضوع في غاية الاهميـة ويحتـاج اتْعقيـب=
امهمتـك منقوضهـا وانـا علـي مفتولـهـا
ماتدري ان الذيب يابن حسين في وسط القليـب=
وماتدري ان القوم ركبت فـي ظهـور خيولهـا
عاين على يمناك يا مال الشحم والذيـب ذيـب=
لا بـارك الله فـي جمـالٍ ماتشيـل حمولـهـا
بنت العليا من يمينك في ضهـر بـي إم جيـب=
مرّت مـع شـارع طويـل العمـر وانتبهولهـا
اطرد ورا بي إمّها ومـا جابـت الدنيـا تجيـب=
حنا لهـا حنـا لهـا وانتـو لهـا وانتـو لهـا
وانا ادري ان طرد المقفي شرهةٍ فينـا وعيـب=
لكن خذت عقلـي مـع نـاس خـذت بعقولهـا
وانا باقوس الوجه والشيطـان يحضـر ويغيـب=
ووالله لو لزم الامر علـى الركـب لا حبولهـا
والحظ عشرين الف مره يخطي ومـره يصيـب=
يالله عساه يصيـب ويجـود طـرف مجدولهـا
ضنيت ظن وياعسـى ضـن ظننتـه مايخيـب=
والاعمال بالنيـة علـى الله رفضهـا وقبولهـا
وحرب البسوس اللي غدت بكليب في وادي جريب=
ما هاضها غير البسـوس بصولهـا وبجولهـا
قال احتزم والخيل والميدان واشـرب ياشريـب=
واهـل الفعايـل لا بـدا الـلازم بـدا مفعولهـا
قمت آهدر مثل الجمل وهو جلس يقنـب قنيـب=
ينقّص ويجمع وانا اضرب عرضها فـي طولهـا
المقصد انها وقفت بـوزان مستشفـى الحبيـب=
ساع نحرت بـاب الطـواري كلهـم فـزو لهـا
خذتلها تقريب ساعة مـن طبيـبٍ فـي طبيـب=
كله لعيـن الجرعـة اللـي ركّـزوا محلولهـا
قمت وقعدت لها على ركبة وفي مثنـاة سيـب=
واثر مْـدرا الاقسـام مثلـي قامـوا وقعدولهـا
قلبي من اللهفه ومن زود الولـه جالـه نحيـب=
سواة قوم ٍ تنتظـر وقـت الوغـى مرسولهـا
لكن على قول المثـل ماللصعيـب الا الصعيـب=
وانا اشهد انهـا هبّلـت فينـي وانـا مهبولهـا
والمشكله يوم خرجت ثم قالت بصـوتٍ شحيـب=
للسايق امش بسرعة وتشّـر بـراس انمولهـا
عيونهـا كنهـا تقـول لخدهـا قوتـوا سليـب=
يالله عسـى يفدنّهـا رمْـد العيـون وحولهـا
نار البدو فـي خدهـا متواقـده تلهـب لهيـب=
وصوت الحطب والنار تلهب مثل صوت حجولهـا
والخشم سيفٍ له شباتٍ تكسر العظـم الصليـب=
وسنونهـا درّة ومرجـان البـحـور ولولـهـا
والصدر بارز والخصر مثل الغصن ري ورطيـب=
ولها ردوفٍ تشتكي مـن لا رجهـا وسمولهـا
تمشي مثل مشي الغزال المستهيـب المستريـب=
ودقة جواد بـن علـي بتقـول قـرع نعولهـا
جوالها الدمعـة وانـا باقـي بجـوال الرهيـب=
يـدق عنـد خروجهـا ويـدق عنـد دخولهـا
البرتقالـه كانهـا متصـدرة فـديـو كلـيـب=
والله ماتاكل عيش مع هـذي ولا هـي حولهـا
عذروبهـا ماترحـم العاشـق ولامعهـا قليـب=
فكوا لها هلْها الحبل من صغرها وارخـوا لهـا
لا واسعد الله سعد من مثلـي تمنـى العندليـب=
انهـا بكـرة العايلـة مضمومـةٍ وآعولـهـا
فنا اشهد انها شق وجه وشلع ثوب وطر جيـب=
بآموت ما قـد راح مـن قـدام عينـي زولهـا
مشت وانا باريتها وآقول هـل مـن مستجيـب=
ثم جفلـت ثـم وقفـت ياصعبهـا يـا عولهـا
ردّت علي تقول حاول يا غريـب اتكـون اديـب=
اللـي تكلمهـا ماتـدري بـن فـلان اشّولهـا
قلت اللكاعة حافظنها كلها عـن ظهـر غيـب=
وعزّ البلـد برجالهـا ماهـو ب فـي بترولهـا
وانا صبي قحطان سـدي فاللقـا سـدٍّ قطيـب=
من لا بـةٍ لـو مالصـلاة لربنـا صلّـوا لهـا
حولين وامي من على خشمي تحلب من الحليب=
وبعض الرجال افطمته امه قبـل يكمـل حولهـا
حسبي عليك الله سبحانه وهـو نعـم الحسيـب=
زادتبك النعمـة عسـى ربـي عليـك يزولهـا
وان قلت ماني لك صحيب آقول منتبلي صحيـب=
الرجـل مـن جنبيتـه والبنـت مـن مريولهـا
سبـت وسبيـت وتبادلنـا الشتايـم والسبيـب=
وضاقت بها عنـد الحقيقـة نفسهـا وهمولهـا
اوجعتها بالحكي لين دموعهـا انهالـت سكيـب=
ويبدو لي انها خربـت الرصّـة وهـي يبدولهـا
جاني رفيق الدرب ينشد قلت لـه لقيـت حديـب=
اصولهـا يابـو شنـب ولا ماهـو بصولـهـا
وانا ادري مافيـك شـك مـره ومافيـك ريـب=
تقولـهـا وتطولـهـا وآقولـهـا واطولـهـا
ترى الثمن ما هو بشرط لكـل مشـوار تعيـب=
كـم مـن رجـال دبّلـت واخصامهـم ثرّولهـا
انا عجزت آجود عنـان الكحيلـة مـن قريـب=
وغيري تناوشها وهـي تبعـد وهـو يدنولهـا
لا والله الا مالنـا ذاليـوم فالطـيـب نصـيـب=
مـادام بيبـان النصيـب مقفـلـة بقفولـهـا
وبدري على بوها تنسيني قضيـة بـو غريـب=
مصيـبـة ياكبـرهـا ياعظمـهـا ياهولـهـا
عسى ان تنال اعجابكم,,

تحياتي,,,

[الباسل]

أخي الحبيب السيف دايم

أشكرك على طرح هالقصيده
وحقيقة الجزء الأول والبيت الأخيرمن القصيده طيب جداً
ويتكلم عن أهم قضايا الأمه التي تشغل أذهنة المسلمين


ولكن ؟؟؟


سالفة البنت راعية البي إم


مطارد البنات
شي اذا فعله المبتلى يستحي أحد يشوفه
وهو يطارد بنت


والأخ يتباهى في القصيدة

بهذا الفعل

وهالفعل ينقص من قدر الرجل وقيمته

ثم قال
ووالله لو لـزم الامـر علـى الركـب لا حبولهـا

يحبو على ركبه لبنت في الشارع
ويذل نفسه لها
والتذلل لايجب أن يكون الا لله عز وجل
ثم الوالدين


وبعدها قال
قمت وقعدت لها على ركبة وفـي مثنـاة سيـب

ثم استرسل في الغزل ووصف محارم المسلمين



وعندما علم انه ليس له نصيب
ارتفع صوته وظهرت الألفاظ الغير محترمه؟؟؟
والتي وجهها لمخلوق أضعف منه بالجسد
لكن والله أعلم انها أعقل منه


وقال في القصيده

وانا صبي قحطـان سـدي فاللقـا سـدٍّ قطيـب

اللي يسوي مثل هالفعل ماوده أحد يعرف من يكون
ولو سئل أنت من قال فارسي أو هندي

إحترامأ لقبائل الجزيره


وهذا اقحم اسم قبيلته العريقه في مطارد بنات
في شي يقطع الوجه
ومفترض الايذكر الا في مواقف الرجال والأمور اللي تطول الوجه



ثم قال
وان قلت ماني لك صحيب آقول منتبلي صحيـب
الرجـل مـن جنبيتـه والبنـت مـن مريولـهـا
سبـت وسبيـت وتبادلنـا الشتايـم والسبـيـب
وضاقت بهـا عنـد الحقيقـة نفسهـا وهمولهـا


بعد ماذا بعد نثر ماء وجهه


ربما يقول البعض انه مثل بها الموقف ليبين
حال الشباب أقول الأمثله اللي ماتنقص من قيمة
الرجل كثيره



هناك تساؤل أخير :
اذا كان الشاعر بفتخر بما فعل أو أنه
لايهمه البعيد من الناس ولا القريب

ألم يفكر في أسرته مثل أخته أو زوجته أو أخيه الصغير
إذا سمعوا قصيدته

هل يرضى مثل هالموقف عليهم
أم أنه يرى أن الموقف عادي ولاحرج فيه
ومايؤدي اليه أمر طبيعي

لاحول ولاقوة الابالله

أشكرك أخي السيف دايم
وهذه وجهة نظر
وتقبل سلامي واحترامي

[السيف دايم]

اخي الباسل وجهة نظر اتقبلها بكل رحابة صدر

ولكن هناك شعر يسمى شعر الغزل فماذا تعتقد ماسبب تسميته بالغزل او الوصف

هل الشاعر ذكر اسم هذه الفتاه لكي تقول (يفكر في اخته وامه و,,,)

الشاعر يتغزل ويمكن بعد انه لم يقابلها بل جعل لها قصه لكي يكون للقصيده مناسبه

ووجهتي نظري انها قصيده غزليه مثل باقي القصائد,

اتمنى من الاخوه ان يشاركونا في هذا ويبدون ارآهم

(((((الباسل))))

اشكر لك مرورك المتميز والغالي الذي هو كصاحبه,,

تحياتي لك ,,

[عذاب]

ابيات رائعه وقويه ومحبوكه 0000 صح السان الشاعر ملااااااااااين × ملااااااااااااااااين0
تدري (يالسيف دايم) اني ونا اقراها مره اضحك 00ومره اتعجب 00ومره احزن 00
مشكوررررررررررر يالطيب على اتحافنا بها 000 وبيض الله وجهك ووجه الشاعر سعد بن شفلوت
وهو من الشعراء الغنين عن التعريف0000 وياليت تزودنا ببعض قصائده--

[الطرقي]

الله لا يهينك يالسيف على نقل هذه الرائعة......
وصح لسان بن شفلوووت.....
من وجهة نظري انها قصيدة رائعة ومعبرة حوت اكثر من موضوع....
وكان الغزل هو الطاغي على القصيدة...و الشاعر أجاد في حبكها......وأنا صراحة استمتعت بقرائتي لها..

الباسل......مقدرين رأيك وفيه ناس الله يجزاهم خيرضد قصائد الغزل بالكلية ربما انك واحد منهم.......
لك وجهة نظرك..وأنا معك فيها الى حد ما.......لا أقول ذالك مجاملة ولكنها الصراحة ووجهة نظر لا تفسد للود قضية........

مشكووووووووور يالسيف...
وتقبل تحياتي يالباسل........

[أبو محمد الودعاني]

عيونهـا كنهـا تقـول لخدهـا قوتـوا سليـب *** يالله عسـى يفدنّهـا رمْـد العـيـون وحولـهـا
نار البـدو فـي خدهـا متواقـده تلهـب لهيـب *** وصوت الحطب والنار تلهب مثل صـوت حجولهـا
والخشم سيفٍ له شباتٍ تكسـر العظـم الصليـب *** وسنونهـا درّة ومـرجـان البـحـور ولولـهـا
والصدر بارز والخصر مثل الغصن ري ورطيـب *** ولهـا ردوفٍ تشتكـي مـن لا رجهـا وسمولهـا

قصيدة رائعة
من شاعر لا يشق له غبار

واحترم وجهة نظرك اخي الكريم الباسل
ولكنه الشعر الغزل ملح القصيد

[الباسل]

أشكرك أخي السيف دايم وأخي الطرقي

أنا لست ضد قصائد الغزل
وكان لي محاولات متواضعه

وأقرأ
وأسمع

ولكن ليس بهذه الطريقه التي تحرج صاحبها أولاً
وتعكس صورة سيئة
يعني المفروض الواحد يستر على نفسه في أمور مثل
هذه

والقصد في الأخت او الام أو الأخ الكبير أو إمام المسجد
أو من يعرفك وتكن له إحترام ويبادلك بنفس الطريقه



أخي السيف دايم

لو أنت أو أنا أو أي واحد من الشباب الله يبعد الشر عنا
وعنكم

طلع بالسياره مثل الشاعر ولقى ذيك البنت وطاردها وحاول
يصل اليها بهالطريقه الغير شريفه والغايه أو الهدف اللي يبي
ياصل اليه معروف


وبعد ماراح البيت جمع أهله وقالهم السالفه لقيت بنت وطردتها بالسياره
وآخر شي سفلت في وسبيتها كنت ابي اتعرف عليها عشان أرضي غريزتي
الجنسيه طبعاً هذه بالدرجه الأولى يعني 99% لهالهدف

وش رايك في هالشخص بأمانه وش نظرتك له

صاحب القصيدة بالضبط سوى نفس الشيء اللهم انه أعلنها على الملاْ
الصالح والطالح الصغير والكبير ولم يستر على نفسه

وبطريقه المطافيق

سمعنا الشعر الغزلي المهذب الرزين من خالد الفيصل
الى المتنبي

الى علي بن إبن أبي طالب كرم الله وجهه

ولا أعلم الحكم الشرعي في سماع شعر الغزل
لكن الله يرحم ويغفر

اليوم كنت في الطريق بالسياره من واشنطن الى الى الولايه الي
أنا فيها وكنت استمع الى خطبة للشيخ عبدالحميد كشك
رحمه الله وغفر الله له


كان يقول :

(( لم تكن العلاقة بين السيد الجليل محمد الصادق الأمين صلى الله عليه وسلم
وبين العفيفة الطاهرة خديجة رضي الله عنها لم تكن

نظرةً
فسلاماً
فكلاماً
فموعداً
فلقاء
ف؟؟؟؟
فصبابة
فتتيماً

وهذا في رده على الدكتوره نوال السعداوي عندما قالت
أن الحجاب يسبب البلاده للمرأه
وأن الرسول كان على علاقة حب مع خديجه


ثم قال

إن الرجال العظماء لايعرفون هذه المهاترات
إنما يعرفها الأقزام

وهل يستطيع القزم أن يطاول السماء
أو أن يمد الى الشمس
يد شلاء


وفعلاً عندما نفكر في كلامه نجد أن من يتتبع حرمات المسلمين
جبان ويخاف من أي شيء من الهيئة من ابوها من اخوها
من أي رجل في الشارع عنده غيره

والعظماء متدينين أوغير متدينين تجدهم يترفعون عن مثل تلك الأمور
قد يكون صاحب معصيه
ولكن لايغدر ويستر على نفسه

يعني لو قال لك واحد شفت الملك عبدالله يطارده بنت في التخصصي
أو في المملكه هل سيقبلها العقل
أو الشيخ عايض القرني يبي يرقم وحده وسفلت فيه... وقالها أنا صبي قرن

أو شخص عادي ليس من المشاهير أو المتدينين ولكنه صاحب مبادئ وقيم وأخلاق
اتهم بمثل ذلك

هل سيصدق أحد

بالتأكيد لا؟؟

لأنهم عظماء



ومثال آخرعلى ذلك لو نظرنا الى حادثة النهضه رغم أن البنات مخطئات
هل كل عاصي أو صاحب كبيره من الشباب الصغار
سيفعل مثل مافعلوه أولئك

أعتقد لا ...

هناك البعض نفسه عاليه
وهناك البعض تؤثر فيه صرخة فتاة واستنجادها
وهناك من يقول انها أضعف مني فلماذا أفرد عضلاتي على
من هو أضعف مني أنا لست جبان
وهناك من يفعل ويدور الستر في مطارده أو غيرها

أخي السيف دايم
طولت عليك وعلى من يتصفح الموضوع
لكن المعذرة

وزبدة الكلام أنه الواحد إذا إبتلي فليستتر ويصور مجتمعه
في أحسن صوره الا اذا كان لطرح قضية هامه

ويفترض أن يسخر الشاعر موهبته لما فيه خير
ولامانع من الغزل العفيف




قصَّتْ ضفائرَها المروءَةُ حينما=جمد الإباءُ وماتت النَّخَواتُ
بكت الفضيلةُ قبل أنْ نبكي لها=أسفاً ، وأدْمتْ قلبَها الشَّهَواتُ
عُذراً ، إذا أقسمْتُ أنَّ الرِّيحَ قد=هَبَّتْ بما لا تفهم النَّعَراتُ
لن يدفَعَ الطُّغيانَ إلا دينُنا=وعزيمةٌ تُرْعى بها الحُرُمات
((إني لأُبصر فجر نَصْرٍ حاسمٍ =ستزفُّه الأنفالُ والحجْرات))والحمد لله العظماء أمثالكم موجودين

[الباسل]

ولايهون أخي المشرف

ماشفت ردك الا بعد الطرح

[عاشق المقنااااص]

قصيدة رائعة

[السيف دايم]

(((عذاااااااااب)))))

مشكوووووووووره على المرور ,,

واذا لقيت شي ما راح اذخره ,,


تحياتي

[السيف دايم]

((( الطرقي )))

مرورك زادها روووووووعه ,,

مشكوووووووووور

تحياتي لك ,,

[السيف دايم]

(((المشرف ))))

مشكووووووووور على المرور يالغالي,,

تحياتي

[السيف دايم]

البااااااااااااسل

كلامك على راسي من فوق ,,

ولك وجهة نظرك واقدرها ,,

يعطيك العافيه

لاهنت ,,,

[السيف دايم]

عاااااااااشق المقناص


مشكوووووووووور على المرور

تحياااااااااااااتي لك,,,,,,,,,,,,

[دايم الشوق]

صح لسان الشاعر

[عبدالله بن مرضي الودعاني]

السلام عليكم ورحمة الله وبركاته
أولا : اشكر الأخ السيف دايم واحترم راي من كان له تعليق على هذه القصيده والشاعر بن شلفوت لانقول انه معصوم من الخطاء ولكن نقول انه شاعر متمكن ومعروف وله تاريخ يستطيع من خلاله أن يتحصن في قلعة الشعراء الغامضين فهذه القصيده قصيدة جميله جدا وله ابعاد واهداف غامضه قد لاينتبه لها الكل فهي لم تنشاء في بدايتها لاحياء شعر الغزل ولكن موضوعها الاساسي هو سجن ابوغريب وتغزل الشاعر حسب مافهمته من القصيده لا يخص به نفسه بل جسد بهذه القصيده ماحصل في ابوغريب وما ذا كان له من الصدى عند شباب الامه الذي هو المسؤل الأول عن الرد على ماحصل ولاكن الشاعر اتى بها عن طريقة معاتبه وحملها نفسه لأنه يعتبر نفسه منضمن هائولا الشباب ولكي لاتعتبر تحريض واضح يحاسب عليه ولكنها بطريقة غامضة جدددددا ولك ان تمعن في قوله اننا بحثنا عن الشفره ووجدناها في ان الذي مشغلنا عن موضوع ابوغريب هو طرد البنات ورسم الطريقه من ذو ان مرت مع طريق طويل العمر الخ وهذا ديدن الكثير 0000 ولكن في الاخيرعاد اعتذردون شباب الغزل وبيين بأن روح الغيره موجودة عنده ولو اخطاء ولذلك قال بدري على الغزل ينسينا ابوغريب وهذا من باب اعادة الثقة واشعال الحماس من جديد وكانه لم يحصل شي وما يزال الموضوع مدرك وهكذا 000 هذا ما استصغته من القصيده وكل له وجهة نظر ونحترمها فقد تكون الاصوب 0000 للجميع الود والورد من محب الجميع ابوطلال

[السيف دايم]

السلام عليكم ورحمة الله وبركاته
أولا : اشكر الأخ السيف دايم واحترم راي من كان له تعليق على هذه القصيده والشاعر بن شلفوت لانقول انه معصوم من الخطاء ولكن نقول انه شاعر متمكن ومعروف وله تاريخ يستطيع من خلاله أن يتحصن في قلعة الشعراء الغامضين فهذه القصيده قصيدة جميله جدا وله ابعاد واهداف غامضه قد لاينتبه لها الكل فهي لم تنشاء في بدايتها لاحياء شعر الغزل ولكن موضوعها الاساسي هو سجن ابوغريب وتغزل الشاعر حسب مافهمته من القصيده لا يخص به نفسه بل جسد بهذه القصيده ماحصل في ابوغريب وما ذا كان له من الصدى عند شباب الامه الذي هو المسؤل الأول عن الرد على ماحصل ولاكن الشاعر اتى بها عن طريقة معاتبه وحملها نفسه لأنه يعتبر نفسه منضمن هائولا الشباب ولكي لاتعتبر تحريض واضح يحاسب عليه ولكنها بطريقة غامضة جدددددا ولك ان تمعن في قوله اننا بحثنا عن الشفره ووجدناها في ان الذي مشغلنا عن موضوع ابوغريب هو طرد البنات ورسم الطريقه من ذو ان مرت مع طريق طويل العمر الخ وهذا ديدن الكثير 0000 ولكن في الاخيرعاد اعتذردون شباب الغزل وبيين بأن روح الغيره موجودة عنده ولو اخطاء ولذلك قال بدري على الغزل ينسينا ابوغريب وهذا من باب اعادة الثقة واشعال الحماس من جديد وكانه لم يحصل شي وما يزال الموضوع مدرك وهكذا 000 هذا ما استصغته من القصيده وكل له وجهة نظر ونحترمها فقد تكون الاصوب 0000 للجميع الود والورد من محب الجميع ابوطلال


ابو طلال ,,

مشكوووووووووووووور على تعليقك المميز ,,,,

ويعطيك العافيه على مرورك العطـــــــــر

لاهنت يابوطلال,,,

تحياتي لك,,,,,,

[جاره القمر]

مشكور يالسيف

ويعطيك العافيه


اختك ..جاره القمر