صقر_الوداعين
18/04/2005, 17:06
امسيكم بالخير واليوم طرت علي سالفت التحدي بين المطيري والدوسري وقبل السالفه هي ان الاطراف ثلاثه وهم الطرف الاول ابن المقموص الغييثي والطرف الثالث عبد الله بن محسن الشكره ( الله يرحمه ويسكنه الجنه) والطرف الثاني المطيري ومايحضرني اسمه وابن المقموص الغييثي وعبد الله الشكري ربع ويعزون بعض اكثر حتا من الاخوان وسالفة التحدي هذي صايره بالكويت في اول الستينات وصار نقاش بين ابن المقموص الغييثي والمطيري والمطيري كان مسؤول وقتها في الدوام على الغييثي وهم دايم بينهم غمز ولمز وعيارات لكن ذا المره اشتد النقاش وقال المطيري حنا امطير اطيب منكم يا الدواسر ورد عليه ابن المقموص وقال حنا فعل واتنو حكيكم واجد ورد المطيري وقال يا دوسري حنا مطير اهل الكرم والجود وانتم يا الدواسر حتى الضيف ما تكرمونه وعليها صار التحدي من اللي يذبح لهم ويختارون المطيري يختار له مطيري وابن المقموص يختار له واحد من بني عمه وشرط ما حد يدري من المعازيب بالتحدي وعليها اختار المطيري اول وهو ذكي المطيري عشان يمدي ابن عمه المطيري الوقت ويذبح لهم وافقو وراحو المطيري وبن المقموص عند معزبهم المطيري ويوم دخلو مجلس المطيري وهو ما يدري بالتحدي الا مجلسه مجلس شيوخ والله مرهي عليه ويقول ابن المقموص في نفسه يا الله يارب انها تجي عكسيه على خويه المطيري ويوم جا وقت العشا ويقلطهم المعزب الا عشا ذا لي مجلسه مجلس شيوخ صالونه ومرق وهنا دور ابن المقموص وهو يكف يده من العشا وهنا زعل المطيري راعي التحدي على ابن عمه المعزب قال سودت والله وجهي سود الله وجهك .وعليها قال ابن المقموص هذا كرمكم اوريك الكرم عندنا .الحين جا دور التحدي للدوسري ويختار ابن المقموص اللي يعزبهم عبدالله بن محسن الشكره وهو بعد ما يدري عن التحدي وهو يقهويهم وابن المقموص ينتفض وفي نفسه يقول تكفا يابن عمي والله اني خابرك كريم ولا انت بردي تكفا الذبيحه طبعا هذا الكلام يقوله داخل نفسه وعليها صد الشكري وراح لجاره عنده غنم وقال يا جاري عندي ضيفان ودور لي ذبيحه اشتريها طيبه قال ابشر وهو يجيبها ويذبحها ويصلخها وابن المقموص كنه على جمر ينطر ابن عمه وش يسوي هو بيذبح ولا لا شوي الا عبد الله بن محسن الله يرحمه حذف وسط المجلس فريصة الذبيحه هذا سلم يعني ترا الذبيحه ذبحت ولا احد يحلف وهو ما يدري عن التحدي وهنا المطيري دنق راسه وهو يقوم ابن المقموص ويحب خشم عبدالله بن محسن وراسه ويتحضنه وقال عز الله انك بيضت وجهي بيض الله وجهك قال عبد الله وش العلم قالو السالفه تحدي وهنا تكلم المطيري يكلم ابن المقموص وقاله والله ان لك ابن عم جيناه تالي الليل وهو عزوبي وحالته مهب مثل ابن عمي اللي الله مرهي عليه واني والله احسدك على ابن عمك ومن يوم شفته وانا قالبي ناغزني هب ياذا القصير ويضحك عبد الله الشكري وقال والله لو ادري انها تحدي كان علوم غير لكن هذي طراتها ان ما احد يدري ونشد ابن المقموص على ذا السالفه اللي صارت ومدح عبدالله ابن محسن الله يرحمه بس للاسف مالقيت احد في الكويت يعرف القصيد واتمنا انها تعجبكم وارجو منكم ان تدعو لعبد الله بن محسن ان الله يرحمه ويسكنه الجنه