ياذيب لاتاكل لحوم بصيِّص (قصة وقصيدة)

[الموج الأزرق]

هذه القصيدةلشاعر مبارك ابن شيبان (الهذيه)
وقال الشاعر هذه القصيدة في وقعتين بين يام والدواسر في سنة واحدة ، إحداهما مع المساعرة وأخراها مع المخاريم ..... وفي الوقعة التي مع المخاريم قتلوا فارساً مشهوراً من يام اسمه بصيص .... وعندما سمع شيخ يام قصيدة الهذيه عندما قال .. ياذيب لاتاكل لحوم بصيص قال : أنا أدري أن الشاعر لايحب بصيص ولكنه قالها مفاخراً يريد أن يخبر العرب أنهم تمكنوا منه وقتلوه .








قـم يانديبي وارتحل عـملـية=نقـش الـعقـيلي ينـبهه فـقارها


تلفـي لنا ريف الهشالى مترك=أميـرنا اللـي عـارف وقـارها

شيـخ على شيخ مورث شيخة=ماهو من اللي شيخـتـه يعتـارها

حيـيت يامـن سفـرته مركية=لا علقت بعـض السفـر بغـبارها



اجمع عصي وافتكر في كسرها=وفرق عصي من منـى كـسارها

يـازينـكم يـمشي سلفكم واحد=حتى العدو منكم يجيـه ذعـارها

لا صاح في عال الجذيبة صايح=لازم تجـيه عـيـادها ومهـارها



ياهيـتـين فـي زمـان واحـد=مايـستـحي مـن عـدها ذكارها

جانا سلامة من جـنوب صايـل=يبغي صخاف الشول في مصدارها

وعين هل البل حاضرين عـندها=وقـامـوا بحق زيارة اللي زارها

ياما رعى في سدها مـن فاطـر=يعجبك غب الكون صك صرارها

ماخليت شـيب المناكـب عـفة=في القفر ترعى دقها وعشـارها

يكون خوف مـن سيـوف درب=ومـوصلات مـن منى دفـارها

ياما ومن في سـدها من خايـف=جر المويـلي يـوم شاف آثارها

خمسة وسبعين غـدوا في شـقة=ماعاد يحـصي عـددها قبـارها

ياذيب لاتاكـل لحوم بـصيـص=والا اللـحـوم الـبـاقـية ودارها

خله وخل السليـمان اهل الصخا=كبار الصحون ومكرمـة خطارها

زلت علوم اهل الجـنوب وزلفت=وجتنا علوم اهل الشمـال اخبارها

ياقـوم مـانبّـابـكـم بمـشبب=والله انكم امحق من تعلوى اكوارها

ياقوم طحتوا في مـواريث سالم=لاد المنيعي مرخصـة اعمـارهـا

وسلامــــــــتكـم ،،،،،،،،،،

[العماني]

لاهنت يا طيف السهر على القصة والقصيدة المعروفة للشاعر الكبير الهذية رحمه الله.

والأبيات ناقصة وبخبرك باللي عندي:



قـم يانديبـي وارتحـل عمليـة=نقـش العقيلـي ينبهـه فقارهـا
تلفي لنا ريـف الهشالـى متـرك=أميرنـا اللـي عـارف وقارهـا
شيخ على شيـخ مـورث شيخـة=ماهو من اللي شيختـه يعتارهـا
حييـت يامـن سفرتـه مركيـة=لا علقت بعض السفـر بغبارهـا
اجمع عصي وافتكر في كسرهـا=وفرق عصي من منـى كسارهـا
يازينكـم يمشـي سلفكـم واحـد=حتى العدو منكم يجيـه ذعارهـا
لا صاح في عال الجذيبة صايـح=لازم تجيـه عيادهـا ومهارهـا
ياهيتين في زمانا واحد =كل درا بعلومها واخبارها
يذكرني الغوي عزافي جدوده= خمسمية يقولها حزارهـــــــا
يام هل الجرات من جدانهم =نعم الرجال اللي تشيع اذكارها
يام مداجرات الملوك بروسهم =لاجات ضو الحرب تشعق نارها
ياقوم مانبا بكم بمشبب= والله انكم امحق من تعلوى اكوارها
ياقوم صحتوا في مورث سالم =لاد المنيعي مرخصين اعمارها
بلا اربعين ما سواهم واحد =والضو شبت بينهم بقطارها
ياذيب لاتاكل لحوم بصيص =عيد الركاب مكرم خطارها
خله وخل السليماني اهل الصخى=وباقي اللحوم التاليه ودارها
زلت علوم اهل الشمال وزلفت =وجاتك علوم اليمن باثارها
جانا سلامه من جنوب صايل=يبغي صخاف الشول في مصدارها
يبغي مقاضاة ذيك بمثلها= هيت تكور ذاك من عورها
لقو هل البل حاضرين عندها= قاموا بحق زيارة من زارها
ياما رعى في سدها مـن فاطـر=يعجبك غب الكون صك صرارها
يكون خوف مـن سيـوف درب=وموصلات مـن منـى دفارهـا
ياما ومن في سدها مـن خايـف=جر المويلي يوم شـاف آثارهـا
ماخليـت شيـب المناكـب عفـة=في القفر ترعى دقهـا وعشارهـا
خمسين وجه كلهم في شقه= ما عاد يحرز دفنها قبارها
ليت ((العتيبي)) حاضر يشوفها =حتى يشوف الخد كيف حمارها
حييت يامن سفرته مركيه =لاعلقت بعض السفر بغبارها
وان كان به خيال فهو ثويني= مع ابن دغمان فقد في غارها
درباه زبن الجاثيات ثويني= كم سايقا بالسيف جذ فقارها
خلا جواده مستصرا واقف شاف =الرصاصه في يمين عذارها


تقبل تحياتي،،،

العماني،،،

[الموج الأزرق]

مشكور يالعماني على الاضافة
ولا هنت يالقرم.

[نواف قطـــر]

مشكوووووووووور ياطيف السهر ومشكووووووووور يالعماني الله لايهينكم

[الموج الأزرق]

والاانت يانواف
ومرورك يسعدني

[ولد المبيعيج]

طيف السهر لاعدمناك على مجهودك يالسنافي

العماني لك جزيل الشكر على متابعتك .....

والشكر للجميع على الروح الاخوية والتفاهم

لاهنتوا

[shamekh6]

بسم الله الرحمن الرحيم

أخي العزيز طيف السهر أخي العزيز العماني (أبو مبارك) تحية عطره لكما على ما تقدموه من قصائد وقصص على صفحات هذا المنتدى .

لإخيكم ملاحظه على ما أوردتموه هنا .

نقلكم من كتاب أشعار الدواسر لمحبوب بن جلحان رحمه الله ؛ وهذه القصيدة متداخله فيها أبيات للهذيه نعم ولاكن القصيدة هذه لبن منصور العمور. وهي كما يلي.


قال الصبي العمري بيوتٍ زينه=قورعٍ من خاطري مختارها
نحستها من ضامري ونقدتها =نقد الدراهم في يدا تجارها
تطري الخييلي فالخييلي شيخنا=وافي الشبور ومكرمٍ خطارها
كم هجمتٍ لاد الخييلي جوبها=جتنا ولا عندك يكون آثارها
منها زباره فاطرك مسميه=جتنا تقزا نايفٍ بعشارها
قرينا بها الضيفان أيام القسا=مناب مثلك رابطٍ خطارها
أغراك فينا طيبنا يامانع=يوم أنك تتبعنا كما طرارها
شكيت لون لون عندنا لك رسمه=والثعل ما يأكل متاع حرارها
الشاعر اللي ذم حربت شيخنا=جعله يجربها وهي بغبارها
يذوق ما ذاق العتيبي منها=هلت عليه المحصنات عبارها
وأنا أقول مابه شيخ إلا مترك=ترثت طهيف من زبون عشارها
شيخ على شيخ مورث شيخة=ماهوب من اللي شيخته معتارها
لاكون سلم من الصواب دخيل=ياحشر يام في نهار مغارها
ما خليت شيب المناكب عفه=في القفر ترعى خلفها وعشارها
نفرح إلى رد البرا من حفها=بمقاطر ماهي تغبا ثارها
ياما ومن في سدها من فاطر=في ساقة البل تستجر حوارها
وياما ومن في سدهم من طارش=جر المويلي يوم شاف أثارها
آلا بضرب من سيوف هرِّب=ومصقلات من منا دفارها
يا راكب من عندنا عمليه=من فوق ما يزها الشداد فقارها
لاجيت وسط المستضاح فصح لهم=حتى تجيك كبارها وصغارها
تلفي لنا عيد الهشالا مترك=عز القصير ومكرمٍ خطارها
حييت يامن هو صديق صادق=يا معطين الخيرين وقارها
حييت يامن سفرته مركيه=لا خليت بعض السفر بغبارها



أما قصيدة الهذيه فهي في الخالدة (من درر الهذيه)

[العماني]

حياك الله يالشامخ ووين الغيبات

طال عمرك القصيدة اللي ذكرتها بينها وبين قصيدة الهذية تشابه في الابيات ويمكن تداخلت الابيات ، بس المناسبه تختلف لأن قصيدة العمري قالها يوم خذوا الخييلات الدواسر ابل مانع بن سالم أمير العجمان بعد ماظهر منه كلمة على الخييلات .

اما قصيدة الهذية فقالها بعد معركة مع يام وعلى فكره القصيدة اللي اسمها من ((درر الهذية )) الموجودة في القصايد الخالده، تختلف عن قصيدة الهذية التي تم ايرادها هنا.

تقبل تحياتي،،،

[ليالي منفوحه]

السلام عليكم

حبيت ابين الإشكاليه بين قصيدة منصور العمري والهذيه


بخصوص قصيدة منصور العمري ... مناسبتها مثل ما قالكم العماني .. يوم خذوا الخييلات الدواسر أبل مانع بن حثلين أمير العجمان بعد ماظهر منه كلمة على الخييلات ..

القصيدة هي كما يلي



قال الصبي العمري بيوتٍ زينـها = قورعٍ مـن خاطـري مختارهـا

نحستها من ضامـري ونقدتهـا = نقد الدراهـم فـي يـدا تجارهـا

كم هجمةٍ لاد الخييلـي شعوهـا = أمست ولا أصبح عنـدك إلا أثارهـا

منها زبـار ٍ فاطـرك مسميهـا = جتنـا تـقـزا نـايـفٍ عشـارهـا

غبوقت الخطار في ليـل الدجـا = ماهـم بمثلـك مذبحـت خطـارهـا

تسب الخييلي والخييلي شيخنـا = وافي الشبور ومكـرمٍ خطارهـا

أغـراك فينـا يامانع طيبنا =يوم أنك تتبعنـا كمـا طرارهـا

الشاعر اللي ذم حربـت شيخنـا =عساه يذوقهـا منـه وهـي بغبارهـا

ويـذوق مـذاق العتيبـي منهـا = عليـه المحصنـات تهـل أعبـارهـا

نسيت يا مانع يومك قصير ٍ عندنا = يومنـا نعطيـك مـن حلـو أثمارهـا

يوم الخييلـي بالجنينـه ضايـف = يبـي يضيـف وضافتـه خطـارهـا



هذه الابيات هي فقط للشاعر منصور العمري اما غيرها من الابيات فهي للشاعر الهذيه


والابيات التي اوردها لنا اخونا الشامخ .. ومثل ما قال القصيده لمنصور العمري لكن هناك ابيات للشاعر الهذيه تداخلت مع القصيده .. وهي من بداية هذا البيت

وأنا أقول مابه شيـخ إلا متـرك *** ترثت طهيف من زبون عشارها

إلى اخر القصيده تعتبر للشاعر الهذيه ..



تحياتي لكم

[shamekh6]

لكم جل التقدير إليكم قصيدة الهذيه رحمه الله


يا هيتين في زمان واحد=كل درا بعلومها وأخبارها
يذكر لي الغاوي عزا في جرده=خمسمية يقولها حزارها
يامٍ هل الجرات من جدانهم=نعم الرجال اللي تشيع أذكارها
يامٍ مداجرت الملوك بروسهم=لاجات ضو الحرب تشعق نارها
يا قوم ما نبابكم بمشبب=والله أنكم أمحق من تعلوا أكوارها
ياقوم طحتو في مورث سالم=لاد المنيعي مرخصين عمارها
بلا أربعين ما سواهم واحد=والضو شبت بينهم بقطارها
يا ذيب لا تأكل الحوم أبصيص=عيد الركاب ومكرمٍ خطارها
خله وخل السليمان أهل الصخا=وباقي اللحوم التالية ودارها
زلت علوم أهل الشمال وزلفت=وجاتك علوم أهل اليمن بأثارها
جانا سلامه من جنوب صايل=يبغي صخاف الشول في مصدارها
يبغي مقضاة لذيك بمثلها=هيت نكور ذالٍ من عورها
لقو هل البل حاضرينٍ عندها=قاموا بحق زيارة اللي زارها
يازينكم يمشي سلفكم واحد=حتى العدو منكم يجيه ذعارها
أجمع عصي وأفتكر في كسرها =وفرق عصي من منا كسارها
خمسين وجه كلهم في شقه=ماعاد يحرز دفنها قبارها
ليت العتيبي حاضر يشوفها=حتى يشوف الخد كيف حمارها
حييت يامن سفرته مركيه=لاعلقت بعض السفر بغبارها
إن كان خيالٍ فهو ثويني=مع أبن دغمانٍ قعد في غارها
درباه زبن الجاذيات ثويني=كم سابقٍ بالسيف جذ فقارها
خلا جواده مستصرٍ واقف=شاف الرصاصه من يمين عذارها
فان كان جاحدني ولاني بصادق=فقل ياشيخ هصمان وايش أخبارها