قبيلة العجمان تزهم قبيلة الدواســـــر

[نواف قطـــر]

يشير ابن لعبون الي معركه جرت في حدود نهاية القرن الحادي عشر ، وذلك ان شيخ العجمان ذلك الوقت ويدعي سالم العبد حصل بينه وبين ابن عريعر نزاع وقد استعان ابن اعريعر بقبيلة الروله وقبيلة مطير واستعان العجمان بقبيلة الدواسر وحصل بينهم مناخ بالقرب من جبل واره وفي هذا المناخ تقابلت الدواسر مع الروله ومطير وقتل في هذا المناخ كثير من الطرفين ، من ابرز القتلي الشيخ وطبان الدويش ، وفي هذه الوقعه اخذت الريشة من قبيلة الروله وكانت هذه الريشه قديمه لدي ابن شعلان تعاقبت عليها عدة اجيال عندهم حتي سميت عندهم ام الدهور لقد مها ولم يسبق ان اخذها احد قبل الدواسر في هذه الواقعه.

وقد وردت قصيده بهذه المناسبه جاء فيها ذكر هذه المعركه ونتائجها حيث يقول شـــاعر الدواســـــــــــر::
يوم وطبان جاء بمطير غازينا ========معه ابن شعلان بالريشه يقدمها
بالفين خيال وانا يوم عدينا=========ا بالي ثمان اميه للحرب نبغيها
نركب علي الخيل ماشي بيلهينا ======= ومن وقعت حربته ماعاد يثنيها
اميه وخمسين قلع من يمانينا ======== وحصان وطبان غلقها يوفيها
ياذيب ياللي مع الصفراء تبارينا ======= عشاك وطبان في مقدم نواصيها
اما ابن شعلان يومه جاهل فينا =======يشمت نصيبه ومن جابه بعد فيها
هذا لعيناك يامنهو موصينا =========الريشه اللي تجيك اخبار راعيها
برماحنا اللي توردها يمانينا ========اخذ المزين وعكفة ريشة فيها
دون العشائر وقلع الخيل ملهينا ======اقفت مطير تشامت في نواعيها


هذا ما احببت بيانه عن هذه القصيده التي تطرق فيها ابن لعبون رحمه الله لأمجاد الدواســـــر

ملحوظه: لازالت الريشه موجوده الي اليوم عند الدواسر وهي عند ابن قويد

====== وارجوا المعذره إذا قصرت========

[نواف قطـــر]

الزايدي والتغلبي من دوسر =========== تاج الفخر ملبوسها من صمودها
حنا هل القيمه رجال الشيمه ========== دواسر كسب الثنا مقصودها

[السهم الملتهب]

مشكوور يالذيب وماقصرت,, بس ياليت تعدل العنوان لانه يوحي بشي اخر

[نواف قطـــر]

شكراااااا علي مرورك يالسهم ابي اقولك شي العجمان هم مرسلين قصيده للدواسر يزهمونهم بنزل القصيده انشالله ========

[السهم الملتهب]

معليش انا المخطي قريتناها( تهزم ) وهي تزهم


اسف جداااااااااااا

[العماني]

الأخ نواف قطر

السلام عليكم ورحمة الله وبركاته

في البداية اشكرك على الموضوع الجميل بس عندي ملاحظات:

أولاً : بخصوص الريشة التي عند ابن قويد هناك من قال انها من مطير وهناك من قال انها من الرولة ولكن المعروف ان الريشة اخذها الدواسر من ملك الشرق السابق (ابن عريعر ) أميردولة بني خالد عندما فزع الدواسر للعجمان ومعهم السهول ومطير ضد ابن عريعر ومن معه من قبائل عنزه وسبيع فيما يسمى ((مناخ الرضيمة)).

وقد اشترط الدويش ان يأخذ الصمان والودائع وهي من ممتلكات ابن عريعر مقابل مساندته للعجمان.
اما الدواسر فلم يشترطوا شيئاً حسب كلام الراوي الشيخ عبدالله الدامر أمير جوده رحمه الله في مخطوطه لديه .وانما حصلوا على ريشة ابن عريعر التي كانت تمثل رمز ملكه ومعلقها في صدر مجلسه.وقد انتصر العجمان ومن معهم في هذه المعركة الكبيره وغنموا الكثير من الغنائم التي لا تحصى ولا تعد واهمها نزول العجمان في وادي المياه والاحساء ومطير في الصمان حيث ان ابن عريعر كان حاكم من قطر الى الكويت وكل هذه المنطقة تحت ملكه وكان يسمى (محجر بيض الحباري) كدليل على سلطته ،وقد قتل في المناخ أمير عنزه مغليث الهذال وانقسمت قبيلة سبيع على نفسها اذا تفرقوا بعد هذه المعركة ولم يصبح لهم شيخ واحد.
يقول نوال الصميلي السبيعي :

ولوا سبيـع التمر ماحداكـم لـوم=ولا عندكـم غـرس تسقـا بماهـا

وقائد الدواسر في المعركة حسب ما ورد في تاريخ ابن بسام وابن بشر ومخطوطة الدامر هو سلطان بن قويد.

يقول الشاعر الحفيف آل مصرا العجمي بعد النصر في مناخ الرضيمة على ابن عريعر قصيدة طويله اختار منها:


تسعين ليلٍ والخلايا معقله=من الجوع قدها بتغرف رقابها
جانا بقومٍ يرهب الضد شوفها=وخيل تهاذب ماعرفنا حسابها
من يوم جانا وابلهم ساهجينها=اخذنا معقلها واخذنا ركابها
ورحنا وجينا بالدويش المسمى=له هدة عند الضحى ينحكا بها(1)
رحنا وجينا بالسهول وخلطهم=برازات عند الضيق تدمي حرابها (2)
وجينا بخطلان الأيدي آل زايد=ربعٍ تراثع بالاحده ركابها (3)

1-البيت دليل اشتراك مطير مع العجمان في المعركة
2-دليل اشتراك السهول مع العجمان في المعركة.
3-دليل اشتراك الدواسر مع العجمان.

اما بخصوص السالفة الأخرى فاعتقد انها على وقت الشيخ شارع بن قويد واعتقد ان ريشة الشعلان ريشة اخرى واخذت منهم كدليل على هزيمتهم لأن المعروف ان عند الرولة هو المزين وربما كانت هناك ريشة معلقة في المزين لأن الشاعر ذكر :


أرمـاحنــا اللي توردهـا يمانينـا =أخـذ المزين وعطفـت ريشتـــه فيهـــا

وقصتها كالتالي:

كان هناك حلف بين الدواسر و مطير و العجمان و الرولة على ان لايعتدي احد على الثاني وكان ابن قويد وجماعته الدواسر مربعين في اطراف الصمان من غرب ونزل على مكان يسما " جنيح" علم الدويش ان ابن قويد نازل في " جنيح " فارسل الى ابن قويد مرسول بأن يخبره ان لايتجه الى " اخبيب الريم " وكان " اخبيب الريم"تحت حما الدويش فوصل المرسول الى ابن قويد واخبره بأن الدويش مرسله ويقولك لاتنزل بمعاويد اهل الوادي على (اخبيب الريم) فزعل ابن قويد من كلمت الدويش لذكره كلمت ( معاويد ) يعني بأن اهل الودي اهل نخل وفلاحه فقاله اذهب الى الدويش واخبره بأن اليوم في " جنيح " وغدآ في " حنوه " وبعد غدآ حنا في" اخبيب الريم " .

فذهب المرسول وابلغ الدويش بالرساله وكان ي تلك السنه بجوارة قبيلة الروله مربعين في الصمان فأرسل الدويش الى ابن شعلان يخبر بما حدث ويستفزع فيه فرد عليه ابن شعلان:
ان جاء باكر وشد ابن قويد من " جنيح " فتراه على كلامه وان كانه ماشد فلا عليك منه.
وفي اليوم الثاني وصل خبر الى الدويش ان ابن قويد شد وفي اتجاه " حنوه " كما ذكر، فارسل الى ابن شعلان يخبره بأن ابن قويد رحل وفي اتجاه " حنوه " فذهب ابن شعلان الى الدويش وجتمع معه فقاله: تولم واستعد لحربهم
فقاله وانت ماذا عنك
قال ابن شعلان انا حاضر اذا تبغا فزعتي
فقاله اكيد
فرد عليه ابن شعلان اذن لنصبحهم قبل ان يصل الى " اخبيب الريم "
فقاله الدويش اجل قدم المزين يا بن شعلان لان امارتك اقدم من امارتي ، .
ووافق ابن شعلان وصبحو الدواسر وجرت المعركه وانتصر الدواسر في هذه المعركه واخذ ابن قويد الريشه والتي لاتزال موجوده عند ابن قويد حتى وقتنا الحاضر وقد ترجل الشاعر سعيد بن خثيعان
المسعري الدوسري بقصيدة لا اعرف منها غير هذه الابيات ولقد ذكرتها انت مشكورا:
.


الدويش وطبان جاب مطيـر غـزينـا= معه بن شعـــلان بالريشـــه يقــديهـــا
حاولانــا بليـــل فـي ممــاسينــــا =علــى صبــاح وبيــوتنـتا فـي مبـانيهــا
الفيــــــن خيــال وان يـوم عــدينـــا= بـــلا ثمـان أميــه للحــرب نبغيهــــا
نـركب على الخيـل ماشيـن بيلهينا= مـن وقعــت حـربتـــه معـاد يثنيهــــا
ميــه وخمسيـــن قلع من يمانينـا= وحصـــن وطبــان غلقهـــا يـوفيهــــا
ياذيـب ياللـي مع الصفـره تبارينا= عشــاك وطبـان فـي مقـدم نواصيهــــا
اما بن شعـلان يومه جـاهل فينــا= يشمـت نصيبـه ومن جـابه معه فيهــــا
هــذا الاعنـاك يامنهــو يوصينــــا =بالـريشــه اللـي تجيــك اعلوم راعيهـــا
معــاد هاشو يوم سمعـو عزاوينـا= قفــت أمطيــر تشـامت في نعـاويهــــا
أرمـاحنــا اللي توردهـا يمانينـا =أخـذ المزين وعطفـت ريشتـــه فيهـــا


هذا والله اعلى واعلم وياليت تخبرنا بقصيدة العجمان التي يزهمون فيها الدواسر.

تقبل تحياتي،،

كتبه : العماني،،،،،،،،

[نواف قطـــر]

الله لايهينك وبيض الله وجهك انا ماجبت شي من عندي هذي روايت ابن لعبون والسالفه اللي قلته صحيحه يالسنافي هي في زمن شارع ابن اقويد والمزين ريشة ابن شعلان موجوده الي اليوم وريشة ابن عريعر موجوده بعد صحيح وانا شبكت السالفه وارجوا المعذ ره ومنكم نستفيد === وقصيدة العجمان بنزله انا شالله ==== تسلم اخوي العماني== وانا اشكرك

[الموج الأزرق]

لاهنت يالعماني ويانواف قطر
وبيض اللة وجيهكم

[نواف قطـــر]

لا لله يهينك ياطيف السهر واشكرك علي مرورك

[المسعري 502]

يعطيم العافيه اخواني والله لايهينكم ومشكورين


اخووووووووووووووكم:المسعري 502

[dagwar]

يا جماعه يا وجيه الخير ويا نواف قطر ويالعماني ماقصرتوا وبيض الله وجيهكم ...
انا اخوكم مسعري من اهل الوادي الريشه اللي عند بن قويد هي ريشة الشعلان واللي اخذها هو شارع بن قويد والى الان موجوده عند الشيخ مران بن قويد وانا حصلت كلام كثير في هذا المنتدى ومنتدى قبيلة مطير وكله يتحدث ان الريشه هي ريشة بن عريعر وهذا كلام بعيد عن الصواب .....
وانا كلمت احد المؤرخين للتاريخ عندنا في الوادي وقالي على تفاصيل الوقعه ....
(ملاحظه فيه ناس تقول ان الواقعه كانت خبيب الريم وهذا غلط )
وهذا كلام المؤرخ ابنقله لكم يقول :
في احد السنين اتجهوا الدواسر الى وارا وهي تقع بين حدود الكويت والعراق وربعوا فيها وفي حين غره دنا عليهم الدويش وطبان ومعه ابن شعلان واعتدوا عليهم فيها وحصل فيها معركه انتصروا فيها الدواسر بقيادة الشيخ شارع بن قويد على الدويش وعلى بن شعلان واخذت الريشة في هذه المعركة وراح معهم اي مع الدويش ناقتين من الشرف لبن مليبن المصارير وراحت مع نحور الخيل واخذها الدويش وقال انها لبن قويد والحقيقة ماهي لبن قويد وبعد المعركة ذبح ناس من الطرفين منهم وطبان الدويش امير مطير ذلك الوقت وتمثل شاعر الدواسر ( سعيد بن خذيعان المساعره ) بهذه القصيده :

الدويش وطبان جاب مطير غازينا
معه بن شعلان بالريشه يقديهـا
حاولانـا بليـل فـي مماسيـنـا
على صباح بيوت في مبانيهـا
بالفيـن خيـال وانا يـوم عدينـا
بلا ثمان أميـه للحـرب نبغيهـا
نركب على الخيل ماشين بيلهينـا
من وقعت حربتـه معـاد يثنيهـا
ميه وخمسين قلع مـن يمانينـا
وحصان وطبـان غلقهـا يوفيهـا
ياذيب ياللي مع الصفرا تبارينـا
عشاك وطبان في مقدم نواصيهـا
اما بن شعلان يومه جاهل فينـا
يشمت نصيبه ومن جابه معه فيها
هذا الاعنـاك يامنهـو يوصينـا
بالريشه اللي تجيك اعلوم راعيها
معاد هاشو يوم سمعو عزاوينـا
قفت أمطير تشامت في نعاويهـا
أرماحنا اللـي توردهـا يمانينـا
أخذ المزين وعطفت ريشته فيهـا
كذلك محمد بن لعبون حليف للدواسر ومعهم في تلك المعركه وقال ابيات منها :
عند اللقا تنشد بني لام مطير
وانشد جماجم روسهم عند وارا
(تاريخ بن لعبون )
ومعليش ياربعنا على الازعاج واعذروني على الاخطاء الاملائيه لكن لاحظت ان فيه ناس كثير فاهمين الموضوع غلط وخلطوا بين ريشة بن عريعر وبين ريشة الشعلان وخلطوا بين المعارك
لكن حبيت اوضح لكم ( الموضوع هذا وصل الى الامير سلمان ووصلته القصة هذي وقصيدتها ووكل ثلاثة من اكبر ادباء المملكة لبحث هذا الموضوع وفعلا اثبت ان الريشة هي ريشة الشعلان واخذت في وارا )
وشكر لكم.....

[الخييلـي]

السلااااام عليكم ,, وبيض الله وجيهكم

ومشكور يالعماني على التوضيح وكفواا والله تحري بالعلووم الطيبه .........


انا كنت اظن ان الريشه اللى خذها ابن قويد هي ريشه للدويش مهيب لابن شعلان لكن لاهنت على الافاده اللى افدتها لنا .............


وتحياتي

[خــيال الجـدعـا]

الله لايهينكم ياجماعة كلكم
ومشكورين
وجعل ايمانكم مايجيها العطب

اخوكم:خيال الجدعا

[خــيال الجـدعـا]

الله لايهينكم ياجماعة كلكم
ومشكورين
وجعل ايمانكم مايجيها العطب

اخوكم:خيال الجدعا