قصيدة ( نادره ) لفاير بن خليف الودعاني الذي سن دية جاره (المذحجي) من جداره رحمه الله

[فالي السيل]

لوم على اللي ما يكافون عليه=الا نمامات وقول وقايل
تجمع لنا الصولات من كل ديرة=قد ضال في الاطواء جميع القبايل
تشادي الدبا الكتفان يوم التوابنا=شالوا علينا موقدات الذبايل
يوم صدقوا الاصحاب فينا وشرهبوا=قد صملوا والله راعي الجمايل
زهمت ربعي ترخص الروح دونها=فتنا وقفوا من ظفرنا جفايل
تنفل علينا عامر هو ومانع=مع تركي الممدوح ماضي الفعايل
تصدقوا الارواح في حومة الوغى=وخذوا الهنادي المرهفات النفايل
لعيناك يا من هي لنا كل موسم=تعيي علينا في السنين المحايل
ولعينا المليحا اللي تلاحن عندنا=جعلنا العدا عنها رذال قتايل
وديت جاري من جداري وفزت بها=والفوز من رب له العبد سايل
حطيت حوشه من عبارة عيالي=ولا خير في هرج بليا صمايل

[أبو محمد الودعاني]

شكرا على هذه المشاركة الرائعة
واذا كان ما عليك كلافه
ممكن قصة الجدار

[سليل المجد]

مشكور وأرجو تزويدنا بالقصيدة والقصة كاملة لاأجل أن يعرف الجميع ما تحوية من القيم والأخلاق والرموز العربية والعادات الحميدة وصدق العقيدة وحب الجار
والله يحفظكم ويرعاكم واللله من وراء القصد
أخوكم سليل المجد

[ولد المبيعيج]

اخوي فالي السليل بيض الله وجهك

وتسلم يمينك على على موضوعك القيم

اللي اكيد ولاشك انه يحمل الدلايل على طيب الاولين ومواقفهم المشرفة

وصح السان فايز الخليفي

والله لايهينك ,,,

[فالي السيل]

سبب ورود القصيدة أو سالفتها بإختصار ... هي إنتصاره ولله الحمد في حربه على المذاحجة المعتدين ... اللي يقولون عن أنفسهم قحاطين ( كن ما بقحطان الكبرى غيرهم ولا أطيب منهم ) ... وسبب الحرب أنهم هالمذاحجة ما باز فيهم معروف ابن خليف يوم دفع دية كاملة لجاره المذحجي الذي وقع عليه جداره ... فأعتدوا على أبله يردون منه الخروج من أرضه الطيبة

فغلب ابن خليف رحمه الله .... المذاحجه بالطيب في الأوله ... ثم يوم ما باز المعروف فيهم وأعتدوا غلبهم بالسيف

وقصة الجدار من سوالف الدواسر اللي ماحدن من القبايل سبقهم عليها ... فأصبحوا يلقبون بوداية جارها من اجدارها ... والفضل لله ثم فايز بن خليف رحمه الله رحمة واسعة وبارك في ذريته ... اللهم آمين

وذكرها الشيخ سيف الغوينمي الولماني رحمه الله في قصيدنه المشهوره بالمصلحه الودعانية


والخامسة الجدار منها وادا ابن اخليف=عطاه الدية وقف(ن)بغيـر امهالهـا
فهـذي خمـسٍ مافعلهـا غيـرهـم=من طلعت البيضـاء الـى حوالهـا

[غزاااال]

السلام عليكم


وش حالكم اكيد انتم بخير يا اهل الكرم والجود كواكب الندى

القصة ذي كان بودي من زمان اعرفها كاملة ودايم اسمع دواسر حنا اللي ودينا جارنا عن جداره


يا سلام على الاخلاق والجود والاصل الطيب

بيض الله وجيه الدواسر اللي محد سبقهم بالكرم خطلان الايدي ما شاء الله تبارك الرحمن

وتسلم يد من كتبها

[نازع الود]

بيض الله وجهك
وتكفوووون من يحفظ قصايد والاعلوم الرجال
لايخلينا ينزلها في المنتدى

ويعطيكم العافيه

[الدبلاني]

السلام عليكم ورحمة الله وبركاته ولا تهون يا فالي السيل إذا مافيه كلافه تذكر القصيده كامله اللي فيها المزايا الخمس لهل الوادي ولا تهون[

[فالي السيل]

الدبلاني

قصيدة المصلحة الودعانية والسوالف الدوسرية للشيخ سيف الغونيمي آل نايف الولامين رحمه الله ... مثبته في هالمنتدى

[alwafa]

الرجاء تزويد الموقع بالمواضيع الحديثة وجعل المنتدى للراي وليس للمديح فالدواسر معروفين عندكم وعند غيركم أكثر منكم .... وارجو ان يفهم القصد .

[نواف قطـــر]

وانت وشحارق حصاتك اذا مدحنا الدواسر فهم اهل المدح والثناء والمنتدي ماحط اللي لهم وارجوا ان تفهم القصد